პირველი სექტემბრიდან არასრულწლოვნებზე ნებისმიერი მედიკამენტის გაცემა იკრძალება.

ამის შესახებ საქართველოს პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარემ დიმიტრი ხუნდაძემ განაცხადა.

ხუნდაძის განცხადებით, შესაბამისი ცვლილება "წამლისა და ფარმაცევტული საქმიანობის შესახებ" კანონში გასული წლის ზაფხულში შევიდა და ამა წლის პირველი სექტემბრიდან ამოქმედდება.

მისივე თქმით, 18 წლამდე მოზარდები მედიკამენტების შეძენას რეცეპტის წარდგენის შემთხვევაშიც კი ვერ შეძლებენ. ხუნდაძის თქმით, მათზე ნებისმიერი ჯგუფის პრეპარატის გაცემა აიკრძალება.

როგორც ხუნდაძემ დღევანდელ პრესკონფერენციაზე განმარტა, მედიკამენტები ზრდასრულმა ადამიანმა უნდა შეიძინოს.

„როდესაც ფარმაცევტი ეჭვს შეიტანს, რომ შესაძლოა პირი არასრულწლოვანი იყოს, მას აქვს უფლება პირადობის მოწმობა მოითხოვოს“,- აღნიშნა ხუნდაძემ.