25 ათასამდე ბავშვი საბავშვო ბაღებში თავისუფალი ადგილის მოლოდინშია

საზოგადოება - 12:59, 20 Aug, 2014

2317

საბავშვო ბაღები მუშაობას 8 სექტემბრიდან განაახლებენ, მანამდე კი თბილისის მერია ბაღებში არსებულ სიტუაციას შეისწავლის, რის შემდეგაც მოლოდინი რეჟიმში მყოფ ბავშვებს შეძლებისდაგვარად დააკმაყოფილებს. ბაღის გარეთ დარჩენილი ბავშვების მშობლების ნაწილს კი იმედი აქვს, რომ წელს მათი შვილები სკოლამდელი აღზრდის დაწესებულებაში მოხვდებიან. ისისნი ამის მიზეზად გადავსებულ ჯგუფებს , მცირე რაოდენობით საბავშვო ბაღებს და გაზრდილ მოთხოვნებს ასახელებენ.

„მას შემდეგ , რაც ჩვენი ხელისუფლების პირობებში, ბაგა-ბაღებში სწავლა უფასო გახდა, ბაღებზე მოთხოვნა გაიზარდა და დღეს 25 ათასამდე ბავშვია თავისუფალი ადგილის მოლოდინში. ჩვენ ჯერჯერობით მათ მოთხოვნას ვერ ვაკმაყოფილებთ, რადგან ბაღებში საკმარისი ადგილები არ არის. წლის ბოლომდე რამდენიმე ბაღში სარემონტო სამუშაოებს ვგეგმავთ, რათა ჯგუფების რაოდენობა გავზარდოთ. შემოდგომაზე კი საპროექტო მომსახურებას შევისყიდით, რომ მომდევნო წლის ბიუჯეტში გავითვალისწინოთ და 10 ბაღის მშენებლობა დავიწყოთ“- განუცხადა თბილისის მერმა დავით ნარმანიამ ინტერნეტ გამოცემა „არის.გე“-ს.

როგორც თბილისის მერიის საზოგადოებასთან ურთიერთობის სამსახურში აცხადებენ, ამ ეტაპზე მიმდინარეობს ბაღების გარეშე დარჩენილი ბავშვების ზუსტი სტატისტიკის მოძიება. ასევე მოწმდება ყველა ბაღის ყველა ჯგუფი, რათა გარეთ დარჩენილი ბავშვების შეძლებისდაგვარად დაკმაყოფილება მოხდეს.

თბილისის მერის ინიციატივას დადებითად აფასებენ ბაღის გარეთ დარჩენილი ბავშვების მშობლები, თუმცა იმის იმედი , რომ წელს მათი შვილები ბაღში მოხვდებიან, არ აქვთ.

„კარგია, როდესაც ვიგებთ, რომ ბაღები უნდა აშენდეს, ვიგებთ , რომ რეაბილიტაცია უტარდება შენობებს, მაგრამ მოთხოვნა იმდენად დიდია, არა მგონია, რომ მერიამ ეს მოთოვნა სრულად დააკამყოფილოს. პირადად მე არ მაქვს იმედი , რომ წელს ჩემი შვილის ბაღში მიყვანას შევძლებ. იმ ბაღში და იმ ჯგუფში , სადაც ჩემი შვილი უნდა შევიყვანო, ერთი ადგილის გათავისუფლებას 20-ზე მეტი ბავშვი ელოდება“-განაცხადა გაზეთ ,,რეზონანსთან“ ერთ-ერთმა მშობელმა.

ამჟამად თბილისში 159 ბაღია. იმისთვის , რომ მოთხოვნა დაკმაყოფილდეს, დამატებით კიდევ 9 ბაღის გახსნაა საჭირო. როგორც ბაღების სააგენტოში აცხადებდნენ, იანვარ -თებერვალში გაიხსნება 3 ახალი ბაღი (ნაძალადევში, ისანსა და სამგორში), თუმცა ეს საკმარისი ისევ არ იქნება.

ამ დრომდე უცნობია , თუ რა ბედი ელის იმ ბავშვებს, რომლებიც რეგისტრაციის გარეშე დარჩნენ . ცნობილია მხოლოდ ის , რომ მშობლებს რეგისტრაცია სექტემბრიდან პერიოდულად შეეძლებათ, რადგან საბავშვო ბაგა-ბაღებში დარეგისტრირებული ბავშვები ბაღიდან გაცდენის გამო გარიცხული ბავშვების ადგილს დაიკავებენ.

მომზადებულია გაზეთ „რეზონანსის“ მიხედვით