კახელები ქიზიყის ორი რაიონის უბედურების ზონად გამოცხადებას ითხოვენ

საზოგადოება - 16:04, 19 Aug, 2014

4946

საქართველოს ფერმერთა და სოფლის მეურნეობის მუშაკთა პროფესიული კავშირის პრეზიდენტი ირინე ფხოველიშვილი, შექმნილ მძიმე მდგომარეობასთან დაკავშირებით გაზეთ „ქრონიკა +“ საუბრობს:

„არსებული მდგომარეობა რეალურად უნდა შეფასდეს, არავის უნდა შეეშინდეს სიმართლის თქმის, -კახეთის ეს ორი რაიონი, არის უბედურების ზონა, რადგან მთლიანად დაიღუპა საშემოდგომო, საგაზაფხულო კულტურები, ხმება მრავალწლიანი ნარგავები და ავტომატურად მეცხოველეობასაც საფრთხე ემუქრება. ფუტკარიც ზოგი გაწყდა, ზოგმა დატოვა სკა და ველურ პირობებში გადავიდა, ხელოვნური ტბორები ისე გაცხელდა, თევზი იხოცება.

გეტყვით, რა შეიძლება გაკეთებულიყო, საქმე ამ მდგომარეობამდე რომ არ მისულიყო, მსგავსი სიტუაციები სხვა ქვეყნებსაც აქვთ, მაგრამ იქ სახელმწიფო მასობრივად იწყებს მინიწყალსაქაჩების შეძენას გლეხებისა და ფერმერებისათვის, მაგრამ ჩვენმა ხელისუფლებამ ეს არ გააკეთა.

ფხოველიშვილის განცხადებით ამ რეგიონში სოფლის მეურნეობის სამინისტროს წარმომადგენელი კონსტანტინე ხიცაიძე იყო ჩამოსული, რომელსაც მოსახლეობამ მინისარწყავი სისტემებით დახმარება სთხოვა, ხიცაიძემ კი განუცხადა , რომ წელს ვერაფერს გააკეთებდნენ , მომავალი წლიდან კი მელიორაციის საკითხებზე უკეთესად იმუშავებდნენ.

ირინე ფხოველიშვილის სახელმწიფოს თხოვს , რომ დაზარალებული გლეხები და ფერმერები მიწის გადასახადისგან გათავისუფლდნენ, ასევე სახელმწიფომ მისცეს საშუალება დონორებს , მიეხმაროს განადგურებულ გლეხობას და სათესლე მასალა მოაწოდონ, რადგან მათ ეს მასალაც არ აქვთ

ფერმერთა პროფკავშირის პრეზიდენტის განცხადებით სადაზღვევო კომპანიები მოსავლის დასაზღვევას ფერმერებს კურიოზულ პირობებს სთავაზობენ-კახეთის რეგიონს წყალდიდობის შემთხვევაში დაეხმარება, ხოლო აჭარა-რაჭა - ლეჩხუმს გვალვის დროს, მაშინ როცა კახეთის მთავარი პრობლემა გვალვაა.

მისი განცხადებით, სოფლის მეურნეობაში სახელმწიფოს არ აქვს ათვლის წერტილი და თვითდინებით , ინერციით მიდის. არ არსებობს მიწის კოდექსი.

მომზადებულია გაზეთ „ქრონიკა +“ ის მიხედვით