„აპოკალიფსიო?? მეორედ მოსვლაო?? არავინ უწყის ეს როდის მოხდება. ნიშნებით ახლოს ვართო?? ქრისტეში საყვარელნო, ნიშნებით ყოველთვის ახლოს ვიყავით, ვართ და ვიქნებით. ყოველ დღე უნდა ვიყოთ მოლოდინში და მზადყოფნაში“, - წერს სოციალურ ქსელში მღვდელმონაზონი ილია ვაშაკიძე და დღევანდელობას შემდეგი სტატუსით ეხმაურება.

მღვდელმონაზონი ილია ვაშაკიძე: „რა ნიშნებზეა ლაპარაკი, როცა ფულით სავსე ჯიბეები, საფულეები და ოცდახუთმილიონიანი არამიზნობრივად დახარჯული ბიუჯეტი გვაქვს თვალწინ და ამავდროულად, შიმშილისაგან და მედიკამენტების უქონლობისგან ასობით ბავშვი თვალსა და ხელს შუა გადიან იქ, სადღაც შორს, ჩვენთვის ნამდვილად მიუწვდომელ წიაღში. მიუწვდომელიო, რატომ ვამბობ?? მიუწვდომელი იმიტომ, რომ ფულით ჯიბესავსე, საფულესავსე და ოცდახუთმილიონიან ბიუჯეტიანი ქრისტიანი ჯერ არვის გაუგია. იოანე კრონშტადტელიო, მეტყვით ან მკითხავთ. კი, ქრისტეში საყვარელნო, გიპასუხებთ. იოანე კრონშტადტელს პირადი ქონება არ გააჩნდა და თუ რამე გააჩნდა, ისიც ღვთისმსახურებას ეკუთვნოდა და არა მას. მისი ქონების 99% ღარიბ-ღატაკებს ურიგდებოდათ.

რა დროს მეორედ მოსვლაა, თუ ასეა?? ჯიპიანი, ღიპიანი, ფულით ჯიბესავსე, ოცდახუთმილიონიან ბიუჯეტიანი ქრისტიანები ვერ დახვდებიან მეორედ მოსვლას. მითუმეტეს, როცა ეს ოცდახუთი მილიონი არამიზნობრივად და ანგარიშგების გარეშე იხარჯება. აბა, ნემსის ყუნწი და აქლემი გავიხსენოთ და წარმოვიდგინოთ მათი მეტროლოგიური არათანხვედრა.

მოკლედ, აპოკალიფსსა და მეორედ მოსვლაზე გადაჭარბებული ფილოსოფია სექტოლოგიაში აპოკალიპტურ ერესადაა წოდებული.

ღმერთმა დაგლოცოთ. მომიხსენიეთ ლოცვებში“.