აჭარის ტურიზმის და კურორტების დეპარატამენტის კონფერენს დარბაზში, საერთაშორისო ბიზნესის განვითარების და ინვესტიციების ხელშეწყობის ცენტრის (IBDIPC) და ტურიზმის დეპარტამენტის ორგანიზებით გაიმართა ტურიზმის სფეროს სტეიკჰოლდერების შეხვედრა. შეხვედრის მთავარი თემა იყო აჭარაში ეკოტურიზმის მიმართულებით ტურისტების მარკეტინგული კვლევის ორგანიზება.

აღნიშნული კვლევა ტარდება საერთაშორისო ბიზნესის განვითარების და ინვესტიციების ხელშეწყობის ცენტრის (IBDIPC) მიერ ევროკავშირის შავი ზღვის აუზის საზღვრისპირა თანამშრომლობის პროექტის „Black Sea Network for Sustainable Tourism - Strategies for joint tourism marketing and development in the Black Sea region (BS NST)” / "შავი ზღვის აუზის ტურიზმის მდგრადი განვითარების ქსელი - რეგიონში ტურიზმის განვითარების და მარკეტინგის ერთობლივი სტრატეგიები“ ფარგლებში. კვლევა ხორციელდება აჭარის ტურიზმის და კურორტების დეპარტამენტთან თანამშრომლობით.

შეხვედრის დროს შედგა კვლევის ძირითადი მიზნების და კითხვარის პრეზენტაცია ტურიზმის კერძო სექტორის წარმომადგენლებისთვის და განხილული იქნა კვლევის პროცესში ტურისტული კომპანიების და სხვა დაინტერსებული ორგანიზაციების ჩართულობის საკითხები.

აღნიშნული კვლევა ძალიან მნიშნვნელოვანია, რამდენადაც მსგავსი ფოკუსირებული (ამ შემთხვევაში - ეკოტურიზმი) კვლევა აჭარის რეგიონში თითქმის არც ჩატარებულა წინა წლებში.

კვლევა გაგრძელდება 3 თვის განმავლობაში (აგვისტო, სექტემბერი, ოქტომბერი) და დაგეგმილია საშუალოდ 2000 რესპოდენტის გამოკითხვა, რომლის შედეგადაც შეიქმნება მნიშვნელოვანი მონაცემთა ბაზა. კვლევის შედეგები გამოყენებული იქნება საინტერესო ანალიტიკური ინფორმაციის მიღებისთვის, რაც დაეხმარება რეგიონს ეკოტურიზმის განვითარების შემდგომი ნაბიჯების, ამ სფეროში ტურისტული სერვისის გაუმჯობესების და მარკეტინგული სტრატეგიის დაგეგმვაში.

ტურისტების გამოკითხვა მიმდინარეობს როგორც ფიზიკური ისე ელექტრონული ფორმით. ფიზიკური კითხვარები რიგდება აჭარის რეგიონში არსებულ ტურისტულ საინფორმაციო ცენტრებში, ეკოტურისტულ ადგილებში და ასევე სტუდენტები (კავკასიის უნივერსიტეტის ბათუმის ფილიალი, ბათუმის სახელმწიფო უნივერსიტეტი) აწარმოებენ რეგიონში არსებული ტურისტების გამოკითხვას. კითხვარის ელექტრონული ვერსია - აქტიურად ვრცელდება სოციალური მედიის, ინტერნეტის და ელ.ფოსტების გამოყენებით.