მედიკამენტები ურეცეპტოდ აღარ გაიცემა! - როგორია ახალი რეგულაციები

საზოგადოება - 15:42, 12 Aug, 2014

7467

მედიკამენტების გაცემის წესში ცვლილებებია. პირველი სექტემბრიდან ურეცეპტოდ გასაცემი წამლების რიცხვი მცირდება. იკრძალება გარკვეული მედიკამენტების ნებართვის გარეშე გაცემა.

ახალ რეგულაციებზე განმარტებები ჯანდაცვის მინისტრმა დავით სერგეენკომ გააკეთა:

„რეცეპტების ინსტიტუტის აღდგენა განაპირობა ორმა მთავარმა მიზეზმა. ერთი - უკონტროლო სააფთიაქო ნარკომანიამ, ხოლო მეორე - თვითმკურნალობამ, რომელიც, როგორც წესი დაუშვებელია და ხშირს შემთხვევაში სიცოცხლისთვის საფრთხეებს ქმნიდა, ოჯახის ექიმთან კონსულტაციები არის უფასო და შეუზღუდავი, რაც შეეხებათ ქრონიკულ პაციენტებს, მათთვის იქნება მრავალჯერადი მოქმედების რეცეპტი, რაც ერთი წლის განმავლობაში იქნება მოქმედი“, - განაცხადა დავით სერგეენკომ.

რაც შეეხება მეორე ჯგუფის პრეპარატებს, სადაც ძირითადად ირიცხება დამამშვიდებელი და დამაძინებელი საშუალებები, ასევე ანტიბიოტიკები და ანტიალერგიული პრეპარატები, სულ 5 ათასამდე პრეპარატია.

„მეორე ჯგუფს განეკუთვნება ისეთი სამკურნალო საშუალებები, მაგალითად როგორიც არის ანტიბიოტიკები, ანტიეპილეფსიური საშუალებები, მაგალითად გულსისხლძარღვთა დაავადების, სტეროიდული და ა.შ. მეორ ჯგუფს მიეკუთვნება საინექციო და საინფუზიო ფორმები, რომლისთვისაც სავალდებულო იქნება ექიმთან ვიზიტი და გამოწერა“, - განაცხადა სამედიცინო საქმიანობის რეგულირების სააგენტოს ფარმაცევტული დეპარტამენტის ხელმძღვანელმა დავით მაჭარაშვილმა.