სურსათის ეროვნული სააგენტოს თბილისის სამმართველოს წარმომადგენლებმა ქალაქის რამდენიმე უბანში მონიტორინგის შედეგად დარღვევები გამოავლინეს. ამის შესახებ სურსათის ეროვნული სააგენტოს მიერ გავრცელებულ განცხადებაშია ნათქვამი.

„სურსათის ეროვნული სააგენტოს თბილისის სამმართველოს წარმომადგენლებმა ქალაქის რამდენიმე უბანში მონიტორინგის შედეგად დარღვევები გამოავლინეს.

ამოღებული და განადგურებულია დიდი რაოდენობით ვადაგასული სურსათი - სხვადასხვა სახეობის ხორცპროდუქტი, მათ შორის 60 კგ ბრაზილიური წარმოების ქათმის ფარში, გაურკვეველი ვადის ქათმის ბარკალი, ძეხვეული, სოსისი, ლორი, ხინკალი, პელმენი; რძის პროდუქტები - კარაქი, მარგარინი, იოგურტი, კეფირი, მაწონი, მდნარი ყველი; თევზი ლეშა; კუსტარული წესით დამზადებული გაურკვეველი წარმოებისა და ვადის ნახევარფაბრიკატები.

ვადაგასული სურსათის რეალიზაციისათვის დაჯარიმდნენ: შარტავას ქუჩაზე - ი/მ "ზაირა ჩხიკვიშვილი", ცოტნე დადიანის ქუჩაზე - ი/მ "სოფიკო დურული", ი/მ "მზევინარი პაიჭაძე" და ი/მ "გია ლურსმანაშვილი" , ჩიტაიას ქუჩაზე - შპს "ჰორიზონტი"; წინამძღვრიშვილის ქუჩაზე - შპს "ვაკე".

გარდა ამისა, ჩიტაიას ქუჩაზე მდებარე შპს "სფერო-SPERO" და შპს "ექსტრა" ეტიკეტირების წესის დარღვევით აწარმოებდნენ ნახევარფაბრიკატებისა და რძის პროდუქტების რეალიზაციას. სურსათზე არ იყო მითითებული დამზადების თარიღი, რეალიზაციის ვადები და პროდუქციის შემადგენლობა, რის გამოც ბიზნესოპერატორები 400-400 ლარით დაჯარიმდნენ“, - ნათქვამია განცხადებაში.