საქართველოს ეკონომიკური განვითარების ცენტრის ხელმძღვანელის, რომან გოცირიძის თქმით, კანონპროექტი, რომელიც ფინანსთა სამინისტრომ მოამზადა და რომელიც საგადასახადო კოდექსში ცვლილებებს ითვალისწინებს, ზოგიერთ ნაწილში არის საკამათო, ანუ ასეთი მიდგომა გამოიწვევს გადასახადების დამალვას. ამის შესახებ გოცირიძე „კვირის ქრონიკასთან“ საუბრისას აცხადებს:

„უნდა მოხდეს საგადასახადო დავალიანებების ჩამოწერა... ფაქტობრივად, გამოდის შერჩევითი ამნისტია გარკვეული კატეგორიის ფირმებისთვის. ზოგიერთ საწარმოს ეპატიება 2005 წლამდე წარმოქმნილი დავალიანება, ზოგიერთს 2009 წლამდე არსებული ჯარიმა. ვნახოთ ვისი პორტრეტები გამოჩნდება საპარლამენტო განხილვებისას. საგადასახადო კოდექსში ცვლილებები უნდა იყოს განხილული კომპლექსურად. უნდა შევხედოთ არა მარტო იმ პირდაპირ მიზანს, რომელსაც ემსახურება ის, არამედ მის ირიბ გავლენასაც.

კერძოდ, გაჩნდება თუ არა „საგადასახადო ხვრელები“, შეიქმნება შემოსავლების დამალვის შესაძლებლობა.

ზოგადად, როგორიც არ უნდა იყოს შეღავათი, ეს ნიშნავს ბიზნესიდან, ანუ ხალხის ერთი ჯიბიდან ფულის გადანაწილებას მეორე ჯიბეში. განსაკუთრებით ეს ეხება დღგ-ს შეღავათ. ამ გადასახადზე მოდის ლომის წილი ბიუჯეტში. ყველა ჩარევა პრეფერენციების სახით ანგრევს საგადასახადო კოდექსს და ძირს უთხრის მაკროეკონომიკურ სტაბილურობას.

ზოგადად არ შეიძლება ვნებათაღელვის ატეხა „ნედლ“ დოკუმენტზე. უნდა შეიქმნას კანონპროექტი და ნახონ სპეციალისტებმა. იქნებ გასწორდეს ხარვეზები? პარლამენტში რომ ერთი ამბავი ატყდება და არც თუ ისე დაუსაბუტებლად, ეს უკვე ნათელია“, - აცხადებს გოცირიძე.

ანო თორელი