ცხრა დღიანი ტყვეობა დასრულდა. 21 წლის ზაქრო ბუთხუზი და 30 წლის პაატა არაქელოვი ცხინვალის დე ფაქტო ხელისუფლების წარმომადგენლებმა ადმინისტრაციული ჯარიმის სანაცვლოდ გუშინ გვიან ღამით გაათავისუფლეს.

მარიონეტული რეჟიმი მათ ე.წ. საზღვრის უკანონო გადაკვეთას ედავებოდა, სწორედ ამ მოტივით გაიტაცეს ისინი ოკუპანტებმა ცხრა დღის წინ გორის რაიონის სოფელი ქვეშიდან.

ადგილობრივები „ნიუპოსტთან“ აცხადებენ, რომ საქართველოს მოქალაქეებს პირობითი საზღვარი არ გადაუკვეთავთ და მოქალაქეების დაკავება საქართველოს მიერ კონტროლირებად ტერიტორიაზე, სოფლის კუთვნილ ბაღებში მოხდა.

უცნობია რა პირობებში იმყოფებოდნენ რუსი ოკუპანტების მიერ გატაცებული პირები, ისინი მედიასთან საუბრისგან ჯერჯერიბით თავს იკავებენ.