კერძო სკოლა "ლოგოსის" დირექტორი გია მურღულია მასწავლებლების სერთიფიცირების თემის შეცვლასთან დაკავშირებით განათლების მინისტრის ინიციატივას აფასებს. მურღულია „ნიუპოსტთან“ საუბარში ამბობს, რომ მასწავლებლების პრაქტიკული საქმიამობის შეფასების იდეა მნიშვნელოვანია, თუმცა ამავდროულად, ეს სისტემა ბევრ კითხვას ბადებს.

„მე როგორც ვიცი ახალი სისტემა ინერგება პროფესიული განვითარებისთვის. თვითონ იდეა, რომ მხოლოდ სერტიფიცირების და გამოცდის საშუალებით არ შეფასდეს მასწავლებელი, ეს სწორი გადაწყვეტილებაა, რადგან მასწავლებლობა არ ნიშნავს მხოლოდ იმას, თუ რა იცის მასწავლებელმა. მასწავლებლობა უფრო მეტად ნიშნავს იმას, თუ როგორ იყენებს ის იმას, რაც იცის და რაც სხვას უნდა ასწავლოს. თუ ამ მიმართულებით იდგემა ნაბიჯი, რომ მასწავლებლის პრაქტიკული საქმიანობა შეფასდეს, ეს მისასალმებელია. თუმცა იბადება ბევრი კითხვა თუ როგორ იქნება ორგანიზებული ეს პროცესი. განსაკუთრებით მნიშვნელოვანია, თუ როგორ გარემოს დაახვედრებს სახელმწიფო ამ ახალ სისტემას, რომ ის მომხიბვლელი იყოს მასწავლებელთათვის“, - აცხადებს მურღულია.

ის არ გამორიცხავს, რომ მასწავლებლების პრაქტიკული საქმიანობის შეფასების შემთხვევაში არსებობდეს კორუფციის საშიშროება.

„ასეთი საშიშროება ყოველთვის არსებობს. როდესაც მასწავლებლის პრაქტიკული საქმიანობის შეფასებაზე მიდგება საქმე, აქ ბუნებრივია სრულიად გამორიცხულია ის ამბავი, რომ ცენტრალიზებულად მოხდეს შეფასება. ბუნებრივია ამ საქმეში ერთვება სკოლა, მაგრამ როგორ ჩაერთვება და რა ადამიანური რესურსით ჩაერთვება ეს ძალიან მნიშვნელოვანია. ასევე მნიშვნელოვანია, თუ რამდენად ზუსტი და მკაფიო იქნება ინსტრუქციები იმ ადამიანებისთვის ვინც ამას გააკეთებს. როგორც ვიცი ადმინისტრაციის წარმომადგენლები და კათედრის ხელმძღვანელები ჩაერთვებიან ამ საქმეში. ეს მოითხოვს უზარმაზარ ძალისხმევას როგორც თეორიული, ისე პრაქტიკული განხორციელების თვალსაზრისით. როგორც უკვე გითხარით, ამ საკითხთან დაკავშირებით ბევრი კითხვაა. საზოგადოებამ და მასწავლებლებმა მკაფიოდ უნდა გაიგონ თუ როგორი სისტემა იქნება ეს“, - განაცხადა მურღულიამ.

ნინო დათაშვილი