„ფიგარო“, საქართველოში მყოფი იმ ფრანგი ტურისტი ქალის შესახებ წერს, რომელიც ჯერ კიდევ ელოდება სასამართლო პროცესს. სასამართლომ კი შეიძლება მას ჯარიმის სახით 2500 ევრო გადაახდევინოს. მიზეზი, რამაც ქართველი მებაჟეები კანონით აამოქმედა და რასაც ფრანგი ტურისტის გაოცება მოჰყვა, თავის ტკივილის წამალი -დეფალგანია. სწორედ ეს წამალი უპოვეს ქართველმა მებაჟეებმა ტურისტს... ამ ფაქტს საფრანგეთში მოღვაწე ქართველი მწერალი და პუბლიცისტი პაატა ქურდაძე „ფეისბუქზე“გამოეხმაურა.

პაატა ქურდაძე: „ქართველი მებაჟეები ფრანგ ტურისტს უკან აღარ უშვებენ, რადგან ეს წამალი შეიცავს კოდეინს, რაც საქართველოში აკრძალულ წამლების სიაში ყოფილა... ახლა, თურმე პოლიციის განყოფილების წინ მანქანაში ათევს ღამეს, - 2500 ევრო მიუსაჯეს ჯარიმა, მაგრამ ეს სასამართლომ უნდა დაადასტუროს... სასამართლოს თარიღი კი ჯერ დაზუსტებული არ არის. საფრანგეთის კონსულს უთქვამს, - ეს პოლიტიკური საქმე არ არისო და ხელები დაუბანია... მადლობა თქვით, ციხეში რომ არ ჩაგსვესო. ეს წამალი საფრანგეთში ანალგინივითაა... მეც ჩამომიტანია. გააფრთხილონ მაინც ტურისტები რა წამლებია აკრძალული და რა შემთხვევაში, თორემ ამ ქალის დღეში როგორც ჩანს სხვა ფრანგებიც ყოფილან და სოლიდარობის ნიშნით ერთად აპროტესტებენო :( ახლაც - ათასნაირი წამალი გამომატანა ჩემმა ცოლმა ყოველი შემთხვევისათვის - ბავშვებს რამე არ დაემართოთო... არ ვიცი როგორ გავარკვიო, რომელიმე მათგანის გამო ციხე ხომ არ მემუქრება“...

როგორც „ნიუპოსტისთვის“ სხვა ფრანგული პუბლიკაციიდან გახდა ცნობილი, ფრანგი ტურისტი ქალი ახალციხის პოლიციასთან ცხოვრობს მანქანაში... ის მანქანით საქართველოში თურქეთიდან ჩამოვიდა.