პროექტ „გამარჯობა პროჯექტის“, იგივე „კაზანტიპის“, სამზადისი ანაკლიაში დასასრულს უახლოვდება. ამ ყოველივესთან დაკავშირებით კაზანტიპის პრეზიდენტი ნიკიტა მარშუნოკი „რეზონანსთან“ საუბრობს:

„ახლა აქ ინფრასტრუქტურული სამუშაოები გამალებულად მიმდინარეობს. შემიძლია გითხრათ, რომ მუშახელი აქ 24 საათის განმავლობაში შეუსვენებლად მუშაობს. მე პირადად ვაკვირდები ყოველგვარ სამუშაოს და პროცესში უშუალოდ ვარ ჩართული. იმედია, ყველაფერი დროულად დასრულდება.

მოგეხსენებთ, რომ ანაკლიის სამი სასტუმრო უკვე მზადყოფნაშია, ისინი ტურისტებს სხვადასხვა ქვეყნიდან ელოდებიან. გარდა ამისა, კარვების ქალაქის მშენებლობა უკვე დასასრულს უახლოვდება, სადაც 2500 კარავი დამონტაჟდება. თითო კარავი 2 კაციანია. ამასთან ერთად, კერძო სექტორში მინიმუმ 17 ათასი ადამინისთვის ადგილები უკვე იჯავშნება. პროექტი საქართველოს დაახლოებით 60 მილიონის შემოსავალს მოუტანს.

ტურისტების რაოდენობა 40 ათასამდე იქნება, თუმცა გამორიცხული არაა, ეს ციფრი კიდევ გაიზარდოს. რაც შეეხება ინფორმაციას კერძო სექტორში ფასების კატასტროფულ ზრდასთან დაკავშირებით, ეს ყოველივე მათი პირადი გადაწყვეტილებაა“, - აცხადებს ნიკიტა მარშუნოკი.