"მოვუწოდებთ იუსტიციის მინისტრს, გაითვალისწინოს საქართველოს კანონმდებლობის მოთხოვნები"

საზოგადოება - 17:13, 29 Jul, 2014

1081

"2014 წლის 9 ივნისს ჩვენმა ორგანიზაციამ საჯარო ინფორმაციის მოთხოვნის თაობაზე მიმართა განცხადებით საქართველოს იუსტიციის სამინისტროს, რაზეც რეაგირება დღემდე არ მომხდარა.
აღნიშნულიდან გამომდინარე გვინდა შევახსენოთ იუსტიციის მინისტრს, რომ საქართველოს ზოგადი ადმინისტრაციული კოდექსით დადგენილ ნორმათა თანახმად ყველას აქვს უფლება, გაეცნოს ადმინისტრაციულ ორგანოში არსებულ საჯარო ინფორმაციას, აგრეთვე მიიღოს მისი ასლები, თუ ისინი არ შეიცავენ სახელმწიფო, პროფესიულ ან კომერციულ საიდუმლოებას ან პერსონალურ მონაცემებს, ამასთან ამავე კოდექსით განსაზღვრულია ინფორმაციის მიწოდებისთვის შესაბამისი ვადა კერძოდ:
საჯარო დაწესებულება ვალდებულია გასცეს საჯარო ინფორმაცია, მათ შორის, ელექტრონული ფორმით მოთხოვნილი საჯარო ინფორმაცია, დაუყოვნებლივ ან არა უგვიანეს 10 დღისა, თუ საჯარო ინფორმაციის მოთხოვნაზე პასუხის გაცემა მოითხოვს:

სხვა დასახლებულ პუნქტში არსებული მისი სტრუქტურული ქვედანაყოფიდან ან სხვა საჯარო დაწესებულებიდან ინფორმაციის მოძიებასა და დამუშავებას;

მნიშვნელოვანი მოცულობის ერთმანეთთან დაუკავშირებელი ცალკეული დოკუმენტების მოძიებასა და დამუშავებას;

სხვა დასახლებულ პუნქტში არსებულ მის სტრუქტურულ ქვედანაყოფთან ან სხვა საჯარო დაწესებულებასთან კონსულტაციას.

ხოლო თუ საჯარო ინფორმაციის გაცემისათვის საჭიროა 10 დღიანი ვადა, საჯარო დაწესებულება ვალდებულია მოთხოვნისთანავე აცნობოს ამის შესახებ განმცხადებელს, საჯარო ინფორმაციის პამასთან როაქტიულად გამოქვეყნება არ ათავისუფლებს საჯარო დაწესებულებას იმავე ან სხვა საჯარო ინფორმაციის მოთხოვნის შემთხვევაში მისი დადგენილი წესით გაცემის ვალდებულებისგან.

როგორც ჩანს საქართველოს იუსტიციის სამინისტრომ და მის დაქვემდებარებაში შემავალმა სსიპ. საჯარო რეესტრის ეროვნულმა სააგენტომ არ გაითვალისწინეს საქართველოს კანონმდებლობის მოთხოვნები და ხელოვნურად შეაფერხეს ჩვენთვის საჯარო ინფორმაციის მოწოდების პროცესი.

შევახსენებთ საქართველოს მთავრობას, რომ სახელმწიფო დაწესებულებათა სრულყოფილი ფუნქციონირება და საზოგადოების განვითარება სწორედ ამ ორგანოთა გამჭირვალობაზეა დამოკიდებული, ხოლო ჩვენი ორგანიზაციის ამოცანა სწორედ ამ ამ ორგანოთა ღიაობა და სრულყოფილი ფუნქციონირებაა, რაც დემოკრატიზაციის პროცესის მნიშვნელოვანი ნაწილია.
გვინდა შევახსენოთ საქართველოს იუსტიციის მინისტრს და იმ ორგანოებს, რომელთაც დაარღვიეს კანონი და დამალეს საჯარო ინფორმაცია, რომ საქართველოს კანონმდებლობა გაკისრებდათ ვალდებულებას, საჯარო ინფორმაციის მოწოდებაზე უარის თქმის შესახებ გადაწყვეტილების მიღების შემთხვევაში, 3 დღის ვადაში გეცნობებინათ დაინტერესებული პირისათვის ამის შესახებ, რაც ასევე უგულებელყავით.

აღნიშნულით ჩვენს ორგანიზაციას სურდა საზოგადოებისთვის მნიშვნელოვანი ინფორმაციის მიწოდება, თუმცა ეს ამ ეტაბზე ვერ იქნა მიღწეული. ჩვენ ვეცდებით ყველა სამართლებრივი მექანიზმის ამოქმედებას რათა ჩვენი საზოგადოება იყოს ინფორმირებული ქვეყანაში მიმდინარე მოვლენების და ორგანოების მუშაობის შესახებ.
ვეჭვობთ, რომ ჩვენს მიერ მოთხოვნილი საჯარო ინფორმაციის საჯაროობამ შესაძლოა ზიანი მიაყენოს კონკრეტულ მაღალჩინოსან პირებს, რადგან ის დასაშვებია არ ემთხვეოდეს თანამდებობის პირების ოფიციალურ განცხადებებს და არ შეესაბამებოდეს რეალურ მონაცემებს.

აქედან გამომდინარე მოვუწოდებთ საქართველოს იუსტიციის მინისტრს, რომ გაითვალისწინოს საქართველოს კანონმდებლობის მოთხოვნები და დაავალდებულოს მისდამი დაქვემდებარებული ადმინისტრაციული ორგანო იმოქმედოს ამ კანონმდებლობის შესაბამისად."