ალდაგის კლინიკა "ახალი სიცოცხლე’’ დღეს ყველა ექიმმა და ექთანმა დატოვა.

ამის შესახებ ინფორმაცია "კომერსანტს" ერთერთმა პაციენტმა მიაწოდა. ჯერჯერობით უცნობია, რა გახდა ექიმების პროტესტის მიზეზი, თუმცა ცნობილია, რომ კლინიკის დატოვების შესახებ განცხადება მეან გინეკოლოგებმა, ანესთეზეოლოგებმა და ექთნებმა დაწერეს.

როგორც ერთ-ერთი პაციენტი აცხადებს, ამ დროისთვის კლინიკა პარალიზებულია, არცერთი ექიმი პაციენტს არ იღებს და არც მშობიარეების მიღება ხდება.

კლინიკა „ახალი სიცოცხლის“ დირექტორი ზაზა სინაურიძე ადასტურებს, რომ კლინიკის ყველა ექიმმა სამსახურიდან წასვლის თაობაზე განცხადება დაწერა.

სამსახურის დატოვების მიზეზად სადაზღვევო კომპანია „ალდაგი“ და მისი შვილობილი კომპანია „ევექსი“ სახელდება.

სინაურიძის განცხადებით, მას შემდეგ, რაც „ალდაგმა“ კლინიკა შეისყიდა ექიმები პაციენტების უსაფრთხოებას ვერ უზრუნველყოფენ და ავადმყოფებს ხარისხიან მომსახურებას ვეღარ სთავაზობენ. პაციენტების სიცოცხლესთან დაკავშირებული შესაძლო გართულებების თავიდან აცილების მიზნით, კლინიკის ყველა ექიმმა სამსახურის დატოვების გადაწყვეტილება მიიღო.

„ახალი სიცოცხლის“ დირექტორი ამბობს, რომ ახალი ხელმძღვანელობასთან არაერთხელ ჰქონდათ მოლაპარაკების მცდელობა, თუმცა, „ალდაგს“ ხისტი პოლიტიკა აღმოაჩნდა და არაფრის შეცვლა ისურვა.

წყარო: "რადიო კომერსანტი"