ახალგაზრდული ადგილობრივი თვითმმართველობის სკოლაში ტრენინგები დაიწყო

საზოგადოება - 21:27, 25 Jul, 2014

1024

ორ დღიანი ტრენინგების ფარგლებში გორის მუნიციპალიტეტში მცხოვრები ახალგაზრდები შეისწავლიან ადგილობრივ თემებში პრობლემების იდენტიფიცირების, მათი ლობირების და ადვოკატირების წესებს გადაწყვეტილების მიმღებ ორგანოებთან. შემდგომი ტრენინგების ფარგლბში კი გაეცნობიან თვითმმართველობის ფუნქციებს და უფლებამოსილებებს, გააანალიზებენ ერთობლივი მუშაობისთვის საჭირო პრინციპებს, მიიღებენ ინფორმაციას დემოკრატიის ძირითადი არსის შესახებ, გაიაზრებენ სამოქალაქო პასუხისმგებლობისა და ინიციატივის საკუთარ თავზე აღების საკითხებს, გააანალიზებენ სამოქალაქო საზოგადოებაში საკუთარ როლსა და ფუნქციას, გაეცნობიან საზოგადოებრივი ჩართულობის ფორმებს და შესაძლებლობებს.

ტრენინგებს უძღვებიან არაფორმალური განათლების ახალგაზრდული ცენტრის ,,მზიანი სახლი“ ტრენერები. გორის შემდეგ ტრენინგების კურსი ჩაუტარდებათ ქარელის, ხაშურის და კასპის მუნიციპალიტეტში მცხოვრებ ახალგაზრდებს, რის შემდეგაც დაგეგმილია სამუშაო ჯგუფების შექმნა პრობლემების კატეგორიზაციის და მუნიციპალიტეტების მიხედვით.

ახალგაზრდული ადგილობრივი თვითმმართველობის სკოლა პროექტის ,,ახალგაზრდების ჩართულობის გაძლიერება რეგიონულ დონეზე საქართველოში“, ფარგლებში შეიქმნა. პროექტის მიზანია ახალგაზრდების გააქტიურება და მათი ჩართულობის გაზრდა ადგილობრივი თემების განვითარებაში, სამოქალაქო საზოგადოების მნიშვნელობის გააზრებისთვის ხელსაყრელი გარემოს შექმნა და ახალგაზრდებისთვის ადვოკატირების პროცესის წარმართვისთვის საჭირო განათლების გაღრმავება - განმტკიცების ხელის შეწყობა.

პროექტი ხორციელდება European Endowment For Democracy-ის მხარდაჭერით და მასში გაერთიანებულნი არიან გორის, ხაშურის, კასპისა და ქარელის მუნიციპალიტეტებში მცხოვრები ახალგაზრდები, რომლებიც კონკურსის წესით შეირჩნენ (თითოეულ მუნიციპალიტეტში 25) და რომლებსაც სურვილი აქვთ, საკუთარი წვლილი შეიტანონ რეგიონის განვითარებაში, მოახდინონ თემში არსებული პრობლემების ადვოკატირება და ითანამშრომლონ თვითმმართველობებთან. პროექტის ფარგლებში ახალგაზრდებს შესაძლებლობა ექნებათ მონაწილეობა მიიღონ ადგილობრივ და საერთაშორისო კონფერენციებში, გაცვლით პროგრამებსა და ტრენინგ-სემინარებში.