ლევან ვასაძე განცხადებას ავრცელებს

საზოგადოება - 12:03, 25 Jul, 2014

4090

ბიზნესმენი ლევან ვასაძე "კაზანტიპის" გამართვის წინააღმდეგ დაგეგმილ აქციასთან დაკავშირებით განცხადებას ავრცელებს, რომელიც "ნიუპოსტს" 26 ივლისის აქციის საინიციატივო ჯგუფის წევრმა ზვიად ტომარაძემ მიაწოდა.
"ნიუპოსტი" აღნიშნულ განცხადებას უცვლელად გთავაზობთ:

"გუშინ ჩემს სახელთან დაკავშრებით ინტერნეტში გავრცელდა მორიგი მცდარი ინფორმაცია იმის შესახებ, თითქოს მე ამჯერად საზოგადოებასა და სამღვდელოებას მოვუწოდებდი შაბათს კანცელარიასთან აქციის ჩასატარებლად "კაზანტიპის" გაუქმების მოთხოვნით.

სინამდვილეში მე მომმართეს ჩემმა მეგობრებმა წინადადებით მომეწერა ხელი საპროტესტო სამოქალაქო პეტიციაზე "კაზანტიპთან" დაკავშირებით, რაზეც მე დავთანხმდი. მთელი "აქცია" კი, როგორც მე ვიცი, იმაში მდგომარეობს, რომ პეტიციის ტექსტს შაბათს მიიტანენ კანცელარიაში.

პირადად მე არავითარი აქციის ორგანიზატორი არა ვარ და ამ კონკრეტულ აქციაზეც, თუ კი იგი ჩატარდება, არ ვიქნები, რადგან ამ კონკრეტულ შემთხვევაში საკმარისად მიმაჩნია ჩემი სამოქალაქო პოზიციის დასაფიქსირებლად ხელის მოწერა საპროტესტო პეტიციაზე, რომლის ტექსტიც შაბათს გადაეცემა ხელისუფლებასა და პრესას",- ნათქვამია ვასაძის მიერ გავრცელებულ განცხადებაში.

შეგახსენებთ, გუშინ გავრცელდა ინფორმაცია, იმის შესახებ, რომ ლევან ვასაძის თაოსნობით მთავრობის კანცელარიასთან 26 ივლისს 19:30 საათზე კაზანტიპის წინააღმდეგ საპროტესტო აქცია გაიმართება.