ეროვნულ გამოცდებზე დაფიქსირებულ ხარვეზებზე ექსპერტი განათლების საკითხებში მანანა ნიკოლაიშვილი კომენტარს აკეთებს. ამის შესახებ ნიკოლაიშვილი „ალიას“ ესაუბრა:

„უკვე ცნობილია უნარჩვევების ქულები და ცნობილი გახდა ასევე უცხო ენების ქულების რაოდენობაც. ოფიციალურად ჯერ არ ვიცით, რამდენი აბიტურიენტი ჩაიჭრა უცხო ენების გამოცდაში, მაგრამ უნარების შედეგები ხომ ვიცით, აბიტურიენტების 11 პროცენტია ჩაჭრილი, ეს კი იმას ნიშნავს, რომ 5 ათასზე მეტმა ბავშვმა მიიღო არადამაკმაყოფილებელი შეფასება.

დავიწყოთ უცხოენების გამოცდიდან: იცით, რომ აბიტურიენტებს წელს ამ გამოცდებზე დაემატათ ე.წ. „მოსმენით“ ტესტის დაწერა, მაგრამ ბავშვების სიტყვით, არსებობდა ორი უკიდურესობა, ერთი ის, რომ ტექსტი იყო ხარვეზით ჩაწერილი, ან გამაყრუებლად ხმამაღლა ისმოდა ტექსტი, ან ზოგან პირიქით - ხმადაბლა. ანუ ტექნიკური წუნი ჰქონდა ამ ჩანაწერს.

ზოგადად გართულებული იყო ქართულისა და უნარ-ჩვევების, ასევე არჩევითი საგნების ტესტებიც, რომელშიც 8 საგანია ჩადებული და მოდით, ერთი წუთით დავეთანხმოთ იმას, რომ ყოველწლიურად გამოცხადებულია, გავართულებთ ტესტებსო, მაგრამ არაპროგრამული მასალა რატომ იდება ტესტებში ამაზე პასუხი არსებობს?“, - აცხადებს ნიკოლაიშვილი.

ანო თორელი