თბილისის 200-ზე მეტ უსახელო ქუჩას სახელი დაერქვა

საზოგადოება - 14:41, 23 Jul, 2014

2144

საჯარო რეესტრის ეროვნულ სააგენტოსთან მჭიდრო თანამშრომლობით, ქ. თბილისის საკრებულოს სახელდების და სიმბოლიკის კომისიამ თბილისში 200-ზე მეტ უსახელო ქუჩას სახელი მიანიჭა.

როგორც ,,ნიუპოსტს“ საჯარო რეესტრიდან აცნობეს, საკრებულოსა და სააგენტოს თანამშრომლობის შედეგად, ათასობით თბილისელმა მოქალაქემ შეძლო ქონების რეგისტრაცია, პირადობის მოწმობის და სხვა დოკუმენტაციის კანონთან შესაბამისობაში მოყვანა, უმისამართო და დაუნომრავ უძრავ ქონებას მისამართი მიენიჭა.

საჯარო რეესტრში ქალაქის დამისამართების ოპტიმალური მოდელი და კონცეფცია შემუშავდა. სააგენტოში მომზადებული ელექტრონული რუკები, სქემატური ნახაზები და გეომონაცემთა ბაზები კი სახელდებისა და ნუმერაციის მისანიჭებლად, თბილისის რაიონულ გამგეობებს გადაეცათ. შედეგად, ქ. თბილისში 200-ზე მეტ უსახელო ქუჩას სახელი დაერქვა.

აღსანიშნავია, რომ შეცვლილი მისამართების გამო, თბილისის მაცხოვრებელებს დოკუმენტაციის ხელახლა აღება არ მოუწევთ. მიუხედავად ცვლილებებისა, საკუთრებისა და მოქალაქეების შესახებ, საჯარო და სამოქალაქო რეესტრების ბაზებში შენახულია როგორც ძველი ინფორმაციები, ისე კორექტირებული მონაცემები.

დედაქალაქში არსებული სამისამართო მონაცემების აღწერა-ინვენტარიზაცისთვის საჯარო რეესტრმა სხვადასხვა პრაქტიკული და საველე სამუშაოები განახორციელა. აღიწერა თბილისის ყველა ქუჩა, დაინომრა ყველა სახლი და ბინა. შეგროვდა დეტალური ინფორმაცია: ქუჩების მიმართულების, გზის საფარის ტიპების, ხეივნების, უსაფრთხოების ობიექტების, ხიდებისა თუ სკვერების, საცხოვრებელი, ადმინისტრაციული, საგანმანათლებლო, სპორტული, კულტურული, სახელმწიფო, სავაჭრო, ჯანდაცვის, საბანკო და სხვა ტიპის შენობების შესახებ.

„დამისამართების სისტემის სრულყოფა მნიშვნელოვნად გააუმჯობესებს როგორც ქალაქგეგმარებას, შენობის, ქუჩის მიგნებას და აღქმას, ასევე ისეთი მომსახურებების მიწოდებას, როგორიცაა პიროვნების, ნაკვეთის, შენობისა და ბინის რეგისტრაცია, სოც. დახმარებების ადმინისტრირება, ფოსტა, სახანძრო, სამართალდაცვითი ღონისძიებები, სასწრაფო დამხარება და სხვა“–აცხადებენ საჯარო რეესტრის ეროვნულ სააგენტოში.

არარსებულ, გამოტოვებულ ან გამეორებულ მისამართებთან დაკავშირებული პრობლემები არაერთხელ გამხდარა მოქალაქეებს შორის გაუგებრობისა და დავის საგანი.

სამისამართო სისტემის შექმნის პროექტით, საქართველოს ყველა დასახლებულ პუნქტში უსახელო გზები და ქუჩები გაქრება. ყველა დაბისა თუ სოფლის სავალ ნაწილს საკუთარი სახელწოდება ექნება, შენობები კი დაინომრება, რაც ნავიგაციის სისტემის სრულყოფას შეუწყობს ხელს.