ბიზნესმენი ვახტანგ რჩეულიშვილი გიგი უგულავასა და „დექსუსის“ საქმესთან დაკავშირებით კომენტარს აკეთებს. გაზეთ „ვერსიასთან“ საუბრისას რჩეულიშვილი აცხადებს, რომ „დექსუსის“ საქმის გამოძიება მხოლოდ მისი და მაია რჩეულიშვილის ინტერესებში შედის და ამიტომ, შესაძლოა მათ გარკვეული საფრთხე ემუქრებათ:

„ბიძინა ივანიშვილისთვის ყველაზე მისაღები პიროვნება ვანო მერაბიშვილი იყო „ნაციონალური მოძრაობიდან“. მას კარგ ორგანიზატორად მიიჩნევდა. როგორც შევარდნაძე იყო დიდი პოლიტიკოსი, ვანო მერაბიშვილი დიდი რეფორმატორი გახლდათ. „ნაციონალური მოძრაობიდან“ მერაბიშვილი ყველაზე ნაკლებად კორუმპირებულია და არც საქართველოს მტრად მივიჩნევ, მაგრამ ნაციონალებს მისი გაწირვაც არ გაუჭირდებათ. პირიქით, ისინი ნებისმიერს გაწირავენ. გიორგი თარგამაძესაც ხომ მოღალატედ მიიჩნევენ, მე ვფიქრობ, რომ იგი კარგი მედიაორგანიზატორია. ასე რომ გიორგი თარგამაძის შემთხვევაში კიდევ არის გასარკვევი, თავადაა მოღალატე, თუ პატარკაციშვილის მიერ გაწირული ვაცი იყო, რომელსაც პოლიტიკურ სამსხვერპლოზე შესაწირად ამზადებდნენ.

ჩემი საქმე გიგი უგულავასა და „დექსუსის“ წინააღმდეგ ჯერკიდევ პროკურატურაში დევს და გამოძიება არ დაწყებულა. ვინმეს ჩემი საქმის გამოძიება რომ უნდოდეს, ამას დიდი ხნის წინ მოახერხებდა, მაგრამ ზოგიერთებს დღესაც აშინებენ, შეიძლება მალე ხელისუფლებაში ნაციონალები დაბრუნდნენო. იმისთვის, რომ გიგი უგულავასა და „დექსუსის“ მიერ მოპარული 61 მილიონი არ გაიშიფროს, შესაძლოა მე და მაიაც გაგვაგორონ, რადგან ამ საქმით დაინტერესებული ერთადერთი პირები ვართ“, - აცხადებს „ვერსიასთან“ საუბრისას ვახტანგ რჩეულიშვილი.