ჟურნალისტი ია ანთაძე საქართველოს ყოფილი პრემიერმინისტრის ბიძინა ივანიშვილის მიერ დაფუძნებული არასამთავრობო ორგანიზაცია „მოქალაქის“ მიერ დღეს გავრცელებულ განცხადებას პასუხობს:

„განცხადება, რომელიც ვნახე იწვევს ჩემში ერთადერთ განცდას, თუკი არსებობს სურვილი იმისა, რომ ჩვენ ვისაუბროთ ძალიან სიღრმისეულად, იმის შესახებ, გვაქვს თუ არა ქვეყანაში დემოკრატია, რა ხარისხის დემოკრატია გვაქვს, საჭიროა თუ არა ამ დემოკრატიის განვითარება და რა მიმართულებით უნდა განვითარდეს, არის თუ არა ამის პოლიტიკური ნება, ამ თემებზე მე ვარ მზად ძალიან სიღრმისეული განხილვისთვის და ნამდვილად გამიხარდება, თუ დაიწყება ამ თემის სიღრმისეული განხილვა“, - განაცხადა ია ანთაძემ.

შეგახსენებთ, რომ დღეს „მოქალაქემ“ გაავრცელა განცხადება, სადაც ნათქვამია:

"13 ივლისს, ერთ-ერთ ტელეარხზე მიწვეულმა ცნობილმა ჟურნალისტმა და ექსპერტმა საუბრისას განაცხადა: ,,ივანიშვილმა ცუდად იცის, რა არის დემოკრატია და დემოკრატიული ინსტიტუტების გაძლიერება“. სამწუხაროდ, გადაცემის წამყვანს არ გაუჩნდა პროფესიონალისათვის შესაფერისი ან თუნდაც ლოგიკური სურვილი, სტუმრისათვის ეთხოვა, განემარტა თავისი დასკვნა და დაეზუსტებინა, რას გულისხმობდა იგი დემოკრატიის ,,ცუდად ცოდნაში“.

ანო თორელი