თბილისის საერთაშორისო აეროპორტში რეისები შეფერხების გარეშე სრულდება, მათ შორის კიევის მმართულებითაც. ამის შესახებ „ქრონიკასთან“ საუბარში აეროპორტების გაერთიანების დირექტორის მოადგილემ ოპერირების დარგში გიორგი მოლოდინაშვილმა განაცხადა.

„ამ ეტაპზე, არც ერთი რეისის გადადება არ იგეგმება. ავიაკომპანიებმა, უსაფრთხოების ზომების მიღების კუთხით, ფრენის მარშუტში გარკვეული ცვლილებები შეიტანეს. კერძოდ, უკრაინიდან მომავალი საჰაერო ხომალდი გამოივლის ოდესის ტერიტორიას, შემოვა თურქეთის ნეიტრალურ საჰაერო სივრცეზე და ამის შემდეგ შემოვა საქართველოში. რადიკალური ცვლილებები რეისების გადადებასთან ან გაუქმებასთან დაკავშირებით, ამ ეტაპზე, არ იგეგმება“ - განაცხადა აეროპორტების გაერთიანების დირექტორის მოადგილემ ოპერირების დარგში გიორგი მოლოდინაშვილმა.

თუმცა, უკრაინაში მომხდარმა ავიაკატარსტოფამ საერთაშორისო ავიამიმოსვლაში მნიშვნელოვანი ცვლილებები გამოიწვია. დღეს მედიაში ვრცელდება ინფორმაცია, რომ ერთ-ერთი უმსხვილესი გერმანული ავიაკომპანია „ლუფთანზა“ აპირებს მიიღოს გადაწყვეტილება, რომ ფრენები აღმოსავლეთ უკრაინის საჰაერო სივრცის გვერდის ავლით აწარმოოს. სავარაუდოდ, ამ კადაწყვეტილებას გერმანული ავიაკომპანია უსაფრთხოების გამო იღებს.

ნინო დათაშვილი