ეროსი კიწმარიშვილს კვირას დაკრძალავენ

საზოგადოება - 12:44, 17 Jul, 2014

1575

ეროსი კიწმარიშვილს კვირას დაკრძალავენ. ამის შესახებ ცოტა ხნის წინ გახდა ცნობილი.

როგორც გარდაცვლილის ძმამ, ზურაბ კიწმარიშვილმა ჟურნალისტებთან საუბარში აღნიშნა იარაღი, რომელიც შემთხვევის ადგილიდანაა ამოღებული ექსპერტიზაზეა გადაგზავნილი, თუმცა როდის იქნება ექსპერტიზის პასუხები ეს ჯერჯერობით უცნობია.

კიწმარიშვილის ოჯახი კვლავ რცება პოზიციაზე, რომლის შესახებ განცხადება მათ ჯერ კიდევ გუშინ გაავრცელეს. ოჯახი არ ეთანხმება თვითმკვლელობის ვერსიას და აცხადებს, რომ საქმეში არსებობს ბევრი კითხვა, რომელსაც გამოძიებამ პასუხი დროულად უნდა გასცეს.

„ახალი დეტალების თაობაზე არ ვარ საქმის კურსში, თუ რამე მნიშვნელოვანი იქნა ბუნებრივია დავინტერესდებით და გავეცნობით. ველოდებით გამოძიებას და ველოდებით ექსპერტიზის პასუხებს“, - განაცხადა ზურა კიწმარიშვილმა.

ოჯახის წევრები თვითმკვლელობას კიდევ ერთ დეტალზე დაყრდნობით გამორიცხავენ. ზურაბ კიწმარიშვილის ინფორმაციით, გარდაცვლილს ღვედი ეკეთა. მისივე თქმით, ეროსი კიწმარიშვილი იჯდა საჭესთან, ეკეთა ღვედი და მანქანის ფარები იყო ანთებული.

„მე ვნახე იარაღი, რომელიც, როგორც ამბობენ მიბჯენით იყო გამოყენებული, მასზე არ იყო სისხლის კვალი, მე სხვაგან ყველგან ვნახე სისხლი, მთელს მანქანაში და იარაღი მომეჩვენა სუფთა, საკმაოდ ახლოს ვნახე და ეს იყო ჩემთვის უცნაური დეტალი“,- აღნიშნა ზურა კიწმარიშვილმა.

ეროსი კიწმარიშვილი 15 ივლისს საკუთარ ავტოფარეხში გარდაცვლილი იპოვეს.

ნინა გოლოშვილი