საქართველოს პრეზიდენტი სენაკის სამხედრო ბაზას ესტუმრა

საზოგადოება - 18:05, 16 Jul, 2014

1605

საქართველოს პრეზიდენტმა თავდაცვის სამინისტროს შეიარაღებული ძალების მე-2 ქვეით ბრიგადას 22 წლის იუბილე მიულოცა.

მარგველაშვილი პირადად შეხვდა სამხედროებს და მათ საცხოვრებელ პირობებს გაეცნო. გიორგი მარგველაშვილმა ყაზარმები მოინახულა და სამხედრო ტექნიკა დაათვალიერა.

პრეზიდენტს სენაკის სამხედრო ბაზაზე გენერალური შტაბის უფროსმა ვახტანგ კაპანაძემ ბრიგადის მეთაურ პოლკოვნიკ ზაზა ჩხაიძესთან ერთად უმასპინძლა, რომლებმაც პრეზიდენტს სამხედროების სასწავლო და კარიერული წინსვლის გეგმა გააცნეს.

„ჩვენი ქვეყნის შეირაღებული ძალები გამოირჩევა განსაკუთრებული გმირობით, სულის სიმტკიცით და მინდოდა გამეზიარებინა მათი სიხარული“, - განაცხადა ქვეყნის პირველმა პირმა.

გენერალური შტაბის უფროსის განცხადებით, მთავარსარდლის არაოფიციალური და მოულოდნელი სტუმრობა ყველა სამხედრო მოსამსახურისთვის სასიხარულო მოვლენაა.„საქართველოს პრეზიდენტი პირადად გაესაუბრა რიგითებს, სერჟანტებს, ოფიცრებს და ეს არის დღე, რომელიც ნამდვილად დაამახსოვრდებათ სამხედროებს“, - აღნიშნა მან.

ქვეყნის პირველმა პირმა სენაკის მე-2 ქვეითი ბრიგადის დაღუპული გმირების მემორიალი მოინახულა და მათ ხსოვნას პატივი მიაგო. გიორგი მარგველაშვილი სენაკის სამხედრო ბაზაზე მაკა ჩიჩუასთან ერთად იმყოფებოდა.