სიცხეში გაზიანი და ტკბილი სასმელების დალევას ერიდეთ

საზოგადოება - 10:30, 16 Jul, 2014

1259

ზაფხულში სიცხე ერთნაირად შემაწუხებელია როგორც შენობაში, ისე ქუჩაში. წელიწადის ამ დროს განსაკუთრებით უჭირთ ქრონიკული დაავადებების მქონე ხანდაზმულებს, რისკის ქვეშ იმყოფებიან გულ-სისხლძარღვთა სისტემის დაავადებების მქონე ადამიანები. ცხელ ამინდში, თუ შესაძლებელია, უმჯობესია ვიმყოფებოდეთ გრილ შენობაში.
განსაკუთრებით ცხელა 12:00-დან 16:00-მდე. ამიტომ დღის ამ მონაკვეთში გირჩევთ თავი შეიკავოთ ქუჩაში სიარულისგან. მაგრამ თუ გასვლა მზის აქტივობის პიკის დროს გიწევთ, შეეცადეთ არ მოხვდეთ მზის სხივების პირდაპირი ზემოქმედების ქვეშ.

რა ჩავიცვათ

ჩაიცვით ნატურალური ქსოვილისგან (ბამბა, სელი, აბრეშუმი) დამზადებული, ღია ფერის ტანსაცმელი, რომელიც ჰაერს ატარებს. მუქი ფერი, ჩვეულებრივ, შთანთქავს სითბოს, ხოლო ღია ტონი - ირეკლავს.

რა დავლიოთ

ზაფხულში ორგანიზმიდან დიდი რაოდენობით სითხე გამოიყოფა, ამიტომ აუცილებელია ორგანიზმის შევსება წყლით. არ დაგავიწყდეთ, რომ თან იქონიოთ წყალი - ყველაზე საუკეთესო საშუალება წყურვილის მოსაკლავად. არ არის რეკომენდებული გაზიანი და ტკბილი სასმელების მიღება, რადგანაც ისინი აშრობს ორგანიზმს და აძლიერებს წყურვილის გრძნობას.

გავგრილდეთ

შეეცადეთ, ხშირად ეწვიოთ საცურაო აუზს, ხოლო სახლში მოსვლისას მიიღეთ გრილი შხაპი, ან სხეულის ცალკეული ნაწილები დაისველეთ ცივი წყლით, რაც შვებას მოგგვრით.

რითი ვიკვებოთ სიცხეში

სიცხის დროს ადამიანის ორგანიზმს ნაკლები კალორიები სჭირდება. ზაფხულში შეეცადეთ რაციონში შეამციროთ ხორცის პროდუქტები, ცხიმები. იკვებეთ ხილითა და ბოსტნეულით.

წყარო: mkurnali.ge