სურსათის ეროვნული სააგენტო მცენარეული წარმოშობის სასოფლო-სამეურნეო პროდუქციის ექსპორტიორებისთვის ხელოვნული ბარიერების შექმნის თაობაზე, მედიასაშუალებით გავრცელებულ ინფორმაციასთან დაკავშირებით განმარტავს აკეთებს. აღნიშნულ განცხადებას "ნიუპოსტი" უცველლად გთავაზობთ:

"1. საექსპორტო ფიტოსანიტარიული სერტიფიკატის გაცემას ახორციელებს მხოლოდ ერთადერთი სახელმწიფო უწყება - სოფლის მეურნეობის სამინისტროს სსიპ სურსათის ეროვნული სააგენტო, რომელიც მკაცრად აკონტროლებს ხილ-ბოსტნეულის საექსპორტო პარტიებს სატრანსპორტო საშუალებებში ჩატვირთვამდე;

2. სააგენტოს კავშირი არ აქვს ბიზნესმენთა ასოციაციებთან ან სხვა კერძო გაერთიანებებთან, რომელთა საქმიანობაც დაკავშირებულია სურსათის ექსპორტთან ან იმპორტთან. ფერმერთა, მეწარმეთა და გადამზიდავთა გაერთიანება ან სხვა სახით თანამშრომლობა დაკავშირებულია მხოლოდ ცალკეული ექსპორტიორების ნება-სურვილთან. თუმცა, სურსათის ეროვნული სააგენტო მიესალმება ნებაყოფლობითი კოოპერაციის ნებისმიერ ფორმას, რომელიც მეწარმეებს ხელს შეუწყობს საქმიანობაში;

3. სურსათის ეროვნული სააგენტო აქტიურად იყო ჩართული რუსეთის ვეტერინარული და ფიტოსანიტარიული კონტროლის ფედერალურ სამსახურთან მოლაპარაკებების ხანგრძლივ პროცესში, რომლის შედეგად, 7-წლიანი პაუზის შემდეგ, რუსეთის ფედერაციაში ეტაპობრივად გავიდა ჩაი, დაფნა, ჩირი, თხილი, ციტრუსი, ყურძენი, ვაშლი, მსხალი, კომში, მოგვიანებით - მაღალი ფიტოსანიტარიული რისკის მქონე მცენარეული წარმოშობის პროდუქტი - ახალი კარტოფილი, პომიდორი, კიტრი, კომბოსტო, ბადრიჯანი, ბალი, ალუბალი, გარგარი, ატამი, ქლიავი, ხურმა, კივი, კენკროვნები, 9 ივლისიდან კი სურსათის ეროვნული სააგენტოსა და რუსი სპეციალისტების ერთობლივად განხორციელებული ფიტოსანიტარიული კონტროლის შემდეგ "როსსელხოზნადზორმა" მიიღო გადაწყვეტილება, მხოლოდ სურსათის ეროვნული სააგენტოს პასუხისმგებლობით, რუსეთის ფედერაციაში დაუშვას ხახვის, სტაფილოს, ჭარხლის, წიწაკის, წითელი ტკბილი წიწაკის, საზამთროსა და ნესვის ექსპორტი.

4. ამჟამად აქტიურად მიმდინარეობს საქართველოდან ატმის, ვაშლატამას და სხვა ხილ-ბოსტნეულის ექსპორტი რუსეთში. ექსპორტის ხელშეწყობის მიზნით, სწორედ სურსათის ეროვნული სააგენტოს ინიციატივით, ექსპორტის განმახორციელებლებისთვის მოქმედებს ერთი ფანჯრის პრინციპი, რაც საშუალებას აძლევს მეწარმეებს, ყველა საჭირო საბუთი, მათ შორის, საბაჟო დოკუმენტაცია და ფიტოსანიტარიული სერტიფიკატი მიიღონ ერთ ადგილას, იქ სადაც ხდება საექსპორტო პარტიების ფორმირება;

5. ამასთან, სურსათის ეროვნული სააგენტო ექსპორტიორებს აცნობებს, რომ რუსეთის ვეტერინარული და ფიტოსანიტარიული კონტროლის ფედერალური სამსახურის „როსსელხოზნადზორის"მოთხოვნაა, მკაცრად იყოს დაცული ფიტოსანიტარიული ნორმები, წინააღმდეგ შემთხვევაში, ის იტოვებს უფლებას, კანონმდებლობის შესაბამისად იმოქმედოს და მიიღოს ქართული პროდუქციის შეზღუდვის გადაწყვეტილება, რაც საფრთხის წინაშე აყენებს ნებისმიერი სასოფლო-სამეურნეო პროდუქციის ექსპორტს რუსეთის ფედერაციაში.

აღნიშნული რისკების გათვალისწინებით, სურსათის ეროვნული სააგენტო კვლავაც გააგრძელებს ხილ-ბოსტნეულის საექსპორტო პარტიების ფიტოსანიტარიულ მკაცრ კონტროლსა და მხოლოდ ასეთი შემოწმების შემდეგ გასცემს შესაბამის სერტიფიკატს",- აღნიშნულია სურსათის ეროვნული სააგენტოს მიერ გავრცელებულ განცხადებაში.