მადლობა ღმერთს, რომ შევარდნაძე ამ ქვეყნიდან მონათლულ, ნაზიარებელ ქრისტიანად წავიდა

მადლობა ღმერთს, რომ შევარდნაძე ამ ქვეყნიდან მონათლულ, ნაზიარებელ ქრისტიანად წავიდა - პატრიარქი

საზოგადოება - 14:44, 13 Jul, 2014

3496

საქართველოს მეორე პრეზიდენტის ედუარდ შევარდნაძის გარდაცვალებასთან დაკავშირებით გერმანიიდან სპეციალური წერილი გამოგზავნა საქართველოს კათოლიკოს-პატრიარქმა უწმინდესმა და უნეტარესმა ილია მეორემ, რომელიც ტაძარში სამგლოვიარო ცერემონიალზე დამსწრე საზოგადოებას მიტროპოლიტმა თეოდორემ წაუკითხა.

"საქართველოს მართლმადიდებელი ეკლესიის და პირადად ჩემი სახელით გამოვთქვამ მწუხარებას საქართველოს ყოფილი პრეზიდენტის, ბატონი გიორგი-ედუარდ შევარდნაძის გარდაცვალების გამო და იმის გამოც, რომ ვერ ვესწრები მის დაკრძალვას. მეტად რთული და წინააღმდეგობებით სავსე დიდი გზა განვლო. სოფელში დაბადებული ადამიანი ათეული წლები მართავდა საქართველოს, შემდეგ კი მსოფლიო მნიშვნელობის პოლიტიკოსი გახდა, რომელმაც დიდი წვლილი შეიტანა ავღანეთიდან ჯარების გამოყვანაში, გერმანიის გაერთიანებაში, კომუნისტური რეჟიმის შეცვლასა და საერთო მსოფლიო ახალი რეალობის ჩამოყალიბებაში. მისი მოღვაწეობის შესახებ ამ დღეებში მრავალი ითქმის. მე მინდა ყურადღება გავამახვილო იმ ცვლილებაზე, რომელიც შედვარდნაძის შინაგანმა სამყარომ განიცადა. პიროვნება, რომელიც ერთგული იყო ათეისტური აზროვნებისა, მოინათლა. მაგრამ, სულიერი ცვლილება უფრო გვიან მოხდა. მადლობა ღმერთს, რომ იგი ამ ქვეყნიდან მონათლული, ნაზიარებელ ქრისტიანად წავიდა. აღვავლენთ ლოცვებს გიორგი-ედუარდის უკვდავი სულისთვის და შევთხოვთ უფალს სავანეთა მართალსათა დააწესოს იგი", - ნათქვამია პატრიარქის სიტყვაში.

ედუარდ შევარდნაძეს კრწანისის რეზიდენციაში 16:00 საათზე, სამხედრო პატივით დაკრძალავენ. სამების ეზოში დაშვებულია სახელმწიფო დროშა და იმყოფება საპატიო ყარაული. ედუარდ შევარდნაძე 7 ივლისს 86 წლის ასაკში გარდაიცვალა.