მოძრაობა ,,დაბრუნების“ განცხადება - გავაგრძელებთ ბრძოლას ,,შადიმანობის“ წინააღმდეგ

საზოგადოება - 15:51, 12 Jul, 2014

2336

,,2014 წლის 26 ივნისს საჯარო ბიბლიოთეკაში გამართული კონფერენციაზე მომხდარი დაპირისპირების შემდეგ ბევრი ადამიანი გამოგვეხმაურა: დევნილი თუ არადევნილი, საქართველოდან თუ უცხოეთიდან, პოლიტიკოსები, საზოგადოებრივი ორგანიზაციების წარმომადგენლები, მეომრები, რუსეთ-საქართველოს ომებში დაღუპულ გმირთა ოჯახის წევრები, რიგითი პატრიოტები. ყველას დიდ მადლობას გწირავთ მხარდაჭერისა და თანადგომისათვის. ცოტანი არ ვყოფილვართ! განსაკუთრებული მადლობა გვინდა ვუთხრათ საზოგადოებრივი მაუწყებლის ჟურნალისტებს და პროდიუსერებს, რომლებმაც ძალიან მაღალი პროფესიული და მოქალაქეობრივი პასუხისმგებლობა გამოავლინეს და საზოგადოებრივ სამსჯავროზე გამოიტანეს ეს ამბავი.

მაგრამ იყო ასეთი ერთეული რეპლიკაც, კერძოდ, ჩვენს განცხადებაზე ამ ფაქტთან დაკავშირებით (კონფლიქტებისა და მოლაპარაკეკების საერთაშორისო კვლევითი ცენტრის სპეციალური განცხადება, http://news.ge/ge/news/story/96495-konfliqtebis-da-molaparakebebis-saertashoriso-kvleviti-tsentri-modzraoba-dabrunebisgan-bodishis-mokhdas-itkhovs და http://www.iccn.ge/geo/component/k2/item/741-specialuri-gancxadeba).

მამუკა არეშიძეს თავისი ორგანიზაცია აეფარა, ბოდიშის მოხდა და განცხადების დეზავუირება მოგვთხოვა. დღევანდელ დღეს არ უხდება რაიმე მკვეთრი განცხადებები, თუმცა არ გვინდა შეიქმნას შთაბეჭდილება, რომ ეს ოპუსი გამოგვრჩა ან მას წავუყრუეთ. მტკიცებულებები, რომლებსაც ითხოვენ თვით ამ განცხადებაშია და კარგად წაიკითხონ საკუთარი ნაცოდვილარი. ძალიან წუხან, რომ ,,ცენტრის“ ფავორიტის პუტინისეული სამხრეები გამოვამზეურეთ. მათ სამხრეებსაც გამოვაჩენთ. მომავალ კვირას კი ასევე სპეციალურ განცხადებას გამოვაქვეყნებთ მათი განცხადების პასუხად სხვა, როგორც თვითონ ითხოვენ, შესაბამისი საფუძვლების მითითებით. ხოლო რაც შეეხება ბოდიშს, რომელსაც მოითხოვენ სამშობლოს დაცვისათვის, ეს, რა თქმა უნდა, არ იქნება! ძალიან კი უნდათ საგონებელში ჩაგვაგდონ და შეგვაშინონ რაღაც რეაგირებით კანონით დადგენილი ყველა საშუალების გამოყენებით, მაგრამ იმთავითვე ვუცხადებთ: ჩვენ გავაგრძელებთ ბრძოლას ,,შადიმანობის“, როგორც მოვლენის, წინააღმდეგ და ეს ბრძოლა მათაც შეეხებათ მანამ, სანამ თავად არ მოუხდიან ბოდიშს საზოგადოებას კაპიტულანტების მფარველობისა და წახალისებისათვის.

არა კოლაბორაცონიზმს, არა მტერთან თანამშრომლობას!“, - ნათქვამია მოძრაობა ,,დაბრუნების“ განცხადებაში.