"განათლების საერთაშორისო ცენტრის კონკურსში მონაწილეობა სტუდენტების უპრეცედენტო რაოდენობამ მიიღო"

საზოგადოება - 12:08, 09 Jul, 2014

982

განათლების საერთაშორისო ცენტრის კონკურსში მონაწილეობა უპრეცედენტო რაოდენობის სტუდენტებმა მიიღეს, - ამის შესახებ მთავრობის ადმინისტრაციის უფროსის მოადგილემ ნინო კობახიძემ განაცხადა.

მისი განცხადებით, 1000 განაცხადიდან 500 შეივსო, გასაუბრებაზე დაბარებული იყო 116 სტუდენტი, დაფინანსება კი საბოლოო ჯამში 78-მა მოიპოვა.

„მოხარულები ვართ, რომ აბსოლუტურად ობიექტურად, გამჭვირვალედ და სამართლიანად მოვახდინეთ სტუდენტების შერჩევა. პრინციპში, უპრეცედენტო შეფასების მოდელი დავნერგეთ. გარდა იმისა, რომ წინასწარ განსაზღვრული კრიტერიუმები იყო, კომისიის შემადგენლობა აბსოლუტური გამჭვირვალეობის და ობიექტურობის გარანტს იძლეოდა. ვფიქრობ, ამაში გასაუბრებაზე მყოფი სტუდენტებიც დარწმუნდნენ. თუმცა, ამის მიუხედავად, მზად ვართ, იმ ადამიანებს, ვისაც კითხვები აქვთ და ვერ მოხვდნენ წელს ივლისის შერჩევაში, დეტალურად გავცეთ პასუხი, თუ რატომ ვერ გაიარეს კონკურსი, რათა შემდეგ მათ კიდევ სცადონ და სექტემბერში მომზადებულები მოვიდნენ. ეს პროექტი მნიშვნელოვანი და პრიორიტეტულია, რადგან სახელმწიფო ფულს დებს ერთი მიზნით, რომ ეს სტუდენტები უკან დაბრუნდნენ და მათ მიერ მიღებული ცოდნა მივმართოთ სახელმწიფო და საჯარო სექტორში“,- განაცხადა კობახიძემ.

მისივე თქმით, ეს პროექტი არის იმის გარანტია, რომ უახლოეს მომავალში საქართველოს ძლიერი პროფესიონალების მთელი გუნდი ეყოლება.