უძრავი ქონების სარეგისტრაციო ტრანზაქციების 2014 წლის ივნისის თვის სტატისტიკა

ბიზნესი & ეკონომიკა - 16:50, 08 Jul, 2014

3144

საჯარო რეესტრის ეროვნული სააგენტოს ოფიციალური მონაცემებით, 2014 წლის ივნისის თვეში უძრავი ქონების სარეგისტრაციო ტრანზაქციათა რაოდენობა წინა წლის იმავე თვესთან შედარებით 9.4%-ით გაიზარდა და ქვეყნის მასშტაბით 45 802 ერთეული შეადგინა. ა.წ. ივნისი 2010-2013 წლების იმავე თვესთან შედარებით უპირატესი ზრდით გამოირჩევა: 2010 წლის ივნისთან (33 820 ერთეული სარეგისტრაციო ტრანზაქცია) შედარებით - ზრდა 35.4%-ით, 2011 წლის ივნისთან (42 318 ერთეული სარეგისტრაციო ტრანზაქცია) შედარებით - ზრდა 8.2%-ით, 2012 წლის ივნისთან (47 407 ერთეული სარეგისტრაციო ტრანზაქცია) შედარებით - კლება 3.4%-ით და 2013 წლის ივნისთან (41 881 ერთეული სარეგისტრაციო ტრანზაქცია) შედარებით - ზრდა 9.4%-ით.

წინა თვესთან შედარებით სარეგისტრაციო ტრანზაქციების რაოდენობა 12.2%-ით გაიზარდა: ზრდა დაფიქსირდა როგორც პირველადი (11.8%-ით), ისე მეორადი (12.2%-ით) სარეგისტრაციო ტრანზაქციების რაოდენობაში. 2013 წლის ივნისის თვეში სარეგისტრაციო ტრანზაქციების თვის ინდექსი (დეკემბერი 2010 =100) დაფიქსირდა 1.089 დონეზე, რაც აღემატება წინა წლის იმავე თვის ინდექსს (0.995). აშკარაა, რომ წინა წლის იმავე თვესთან შედარებით გაიზარდა უძრავი ქონების როგორც პირველადი (7.2%-ით), ისე მეორადი (9.9%-ით) ტრანზაქციების რაოდენობა. 2013 წლის ივნისის თვეში პირველადი სარეგისტრაციო ტრანზაქციების რაოდენობამ - 8 656, ხოლო მეორადი სარეგისტრაციო ტრანზაქციების რაოდენობამ - 37 146 ერთეული შეადგინა; სარეგისტრაციო ტრანზაქციების თვის ინდექსი (დეკემბერი 2010=100) კი პირველადი და მეორადი სარეგისტრაციო ტრანზაქციების მიხედვით შესაბამისად 0.782 და 1.198 დონეებზე დაფიქსირდა.

რაც შეეხება პირველად და მეორად სარეგისტრაციო ტრანზაქციებს შორის თანაფარდობას, წინა წლის იმავე თვესთან შედარებით შემცირდა პირველადი სარეგისტრაციო ტრანზაქციების წილი: ა.წ. ივნისში განხორციელებული სარეგისტრაციო ტრანზაქციების 81.1%-ს მეორადი, ხოლო 18.9%-ს პირველადი სარეგისტრაციო ტრანზაქციები შეადგენდნენ (2013 წლის ივნისში კი - შესაბამისად 80.7% და 19.3%).