საქართველოს პრემიერ-მინისტრი ირაკლი ღარიბაშვილი საქართველოს სახელმწიფო დაცვის სპეციალური სამსახურის უფროსის მოადგილის, გიორგი იმერლიშვილის ტრაგიკულად დაღუპვის გამო მწუხარებას გამოთქვამს.

როგორც პრემიერის სამძიმრის წერილშია აღნიშნული, ის ყოველთვის იქნება მისი კოლეგების და მეგობრებისთვის იმის მაგალითი, როგორ უნდა საქმის კეთება დიდი პროფესიონალიზმით და დიდი სიყვარულით.

“უდიდეს მწუხარებას გამოვთქვამ საქართველოს სახელმწიფო დაცვის სპეციალური სამსახურის უფროსის მოადგილის, ვიცე-პოლკოვნიკ გიორგი იმერლიშვილის ტრაგიკულად დაღუპვის გამო.

ჩვენ დავკარგეთ შესანიშნავი ადამიანი, მოქალაქე, მაღალი რანგის პროფესიონალი, გამორჩეული და ერთგული მეგობარი, კარგი ქართველი კაცი, საკუთარ სამშობლოზე შეყვარებული და მისი უანგარო მსახური.

ძალიან ძნელია იმის დაჯერება, რომ გია ჩვენს გვერდით აღარ არის. ის ყოველთვის იქნება მისი კოლეგებისა და მეგობრებისთვის მაგალითი იმისა, როგორ უნდა საქმის კეთება დიდი პროფესიონალიზმით და ამავე დროს დიდი სიყვარულით.

თანაგრძნობას ვუცხადებ და ვუსამძიმრებ გიორგი იმერლიშვილის ოჯახს, მის ნათესავებს, მეგობრებსა და კოლეგებს, ვიზიარებ მათ დიდ მწუხარებასა და ტკივილს”, - აღნიშნულია პრემიერ-მინისტრის მიერ გავრცელებულ სამძიმრის წერილში.

გიორგი იმერლიშვილი 2 დღის წინ, მცხეთასთან მომხდარი ავტოსაგზაო შემთხვევის შედეგად გარდაიცვალა.