თეა წულუკიანმა რუსთავში რეგიონული არქივის მშენებლობა დაათვალიერა

საზოგადოება - 20:19, 04 Jul, 2014

1802

საქართველოს იუსტიციის მინისტრმა თეა წულუკიანმა ქალაქ რუსთავში ეროვნული არქივის ქვემო ქართლის რეგიონული არქივის მშენებლობა დაათვალიერა.

იუსტიციის მინისტრის განმარტებით, მშენებლობა სწრაფი ტემპებით მიმდინარეობს.

„ვაშენებთ ქვემო ქართლის რეგიონულ არქივს. ეს იქნება უფრო მყარი შენობა, ვიდრე რომელიმე სხვა, რადგან აქ უნდა შეინახოს ჩვენი ეროვნული მეხსიერების მტკიცებულებები, დოკუმენტები და მას სჭირდება სპეციფიკური კონსტრუქცის შენობა. ეს არის თანამედროვე პროექტი, მაგრამ, ამავე დროს, აბსოლუტურად შესაბამისი იმ პირობებისა, რომელიც სჭირდება სხვადასხვა ტიპის დოკუმენტაციის შენახვას იმისთვის, რომ საცავი პირობები იყოს დაცული და ჩვენს შთამომავლობას გადავცეთ შესაბამისად შენახული, დაცული, დოკუმენტირებული მასალები ჩვენი ეროვნული მეხსიერების. მშენებლობა ძალიან სწრაფი ტემპით მიდის. ბედნიერი ვარ, რომ ტენდერის გზით ჩვენ შეგვხვდა კეთილსინდისიერი სამშენებლო კომპანია, რომელიც ზრუნავს, რომ ეროვნული არქივის შენობა იყოს ხარისხიანი“, − განაცხადა იუსტიციის მინისტრმა თეა წულუკიანმა.

რეგიონული არქივი მეგობრობის გამზირზე, იუსტიციის სახლის მოპირდაპირე მხარეს, შენდება. შენობა 5-სართულიანია და მისი საერთო ფართი 1558 კვადრატულ მეტრს შეადგენს. აქედან 968 კვადრატულ მეტრზე დოკუმენტების საცავი განთავსდება, რომელიც ხანძარსაწინააღმდეგო და კონდიცირების თანამედროვე სისტემებით იქნება აღჭურვილი. რუსთავის რეგიონულ არქივში განთავსდება რუსთავის, მარნეულის, გარდაბნის, დმანისის, ბოლნისის, თეთრიწყაროს, წალკის − სულ 284 .509 საარქივო დოკუმენტი.

რუსთავის არქივის მშენებლობის დასრულება წლის ბოლოსთვისაა დაგეგმილი. სამშენებლო სამუშაოებს ტენდერში გამარჯვებული კომპანია შპს „ალიანსი“ აწარმოებს.