ნიქოზისა და ცხინვალის მიტროპოლიტს მეუფე ისაიას ნიქოზის საკათედრო ტაძარში უკვე რამდენიმე თვეა წირვა ლოცვა არ აღუვლენია. ამის მიზეზი ის არის რომ, მეუფე ოკუპირებული ტერიტორიიდან, კერძოდ ახალგორიდან უკან დაბრუნებას ვეღარ ახერხებს. როგორც "ნიუპოსტთან" პირად საუბარში ნიქოზში მეუფე ისაიას რეზიდენციაში ამბობენ, ის ახალგორში მოქმედი ეკლესია მონასტრების მოსანახულებლად ორ თვეზე მეტია რაც წავიდა და უკან არ დაბრუნებულა. რეზიდენციაში იმასაც გვეუბნევიან, რომ ამის მიზეზი დე-ფაქტო ცხინვალის მიერ დაწესებული შეზღუდვებია, რომელიც ახალგორის ტერიტორიაზე შესასვლელად და გამოსასვლელად ვრცელდება. ნიქოზელების გარკვეულ ნაწილს მეუფე ისაიას ადგილსამყოფელთან დაკავშირებით განსხვავებული ინფორმაციები აქვთ. როგორც ერთ-ერთი ადგილობრივი გვიყვება, მეუფე ოკუპანტებმა დააკავეს და ცხინვალში გადაიყვანეს.

" ზუსტად არ ვიცი რა ტერიტორიაზე აიყვანეს მაგრამ, ის რომ რუსებს დაკავებული ჰყავთ ვიცი, ცხინვალში ჰყავთ",- აცხადებს ერთ-ერთი ადგილობრივი მკვიდრი.

თუმცა აღნიშნული ინფირმაციის საპირისპირო განცხადებებს აკეთებს ნიქოზელების კარკვეული ნაწილი.

"როგორც ვიცი ახალგორში იმიტომ არის გაჩერებული რომ, რიგს ელოდება. საბუთის უქონლობის გამო ვერ ბრუნდება. ორი სამი თვეა რაც იქ არის", - ამბობს ადგილობრივი მკვიდრი ტრისტან ლომსაძე.

"ნიუპოსტი" ნიქოზის ტერიტორიული ორგანოს რწმუნებულს ესაუბრა, რომელსაც ორი კვირის წინ ოკუპირებულ ტერიტორიაზე მყოფ მეუფესთან სატელეფონო საუბარი ჰქონდა.

"ახალგორშია მონასტერში, რომელიც ნიქოზის და ცხინვალის ეპარქიას ეკუთვნის. დროებითი პასპორტი ჰქონდა ფორმა ნომერი ცხრა, ვადა გაუვიდა და ამიტომ ვერ ბრუნდება. ახალი საშვის მიღებას ელოდება. ბოლოს ორი კვირის წინ ვესაუბრე. არ ვიცი როდის დაბრუნდება მითხრა, რომ საშვის მიღებას ელოდება", - აცხადებს იოსებ ლაცაბიძე.

მეუფე ისაიასთან დაკავშირებით საპატრიარქოს ამ დრომდე განცხადება არ გაუვრცელებია.

აღსანიშნავია ის რომ, დე-ფაქტო ცხინვალის ხელისუფლებამ ბოლო დროს საშვის ე.წ. ფორმა ცხრის მოქალაქეებზე გაცემის პროცესი გაართულა. აღნიშნული საშვით მოქალაქეები ოკუპირებულ ახალგორში შესვლას და გამოსვლას ახერხებენ.

გიორგი ახალკაცი, "ნიუპოსტი", გორი