მსოფლიოში აღიარებული მუსიკოსის ლიანა ისაკაძის ღია წერილს თბილისის სახელმწიფო კონსერვატორიის რექტორი პასუხობს. რეზო კიკნაძე გერმანიაში სწავლის პერიოდს იხსენებს და ლიანა ისაკაძეს სწავლების საფასურის გადახდისთვის კიდევ ერთხელ უხდის მადლობას.

რეზო კიკნაძე: „ქალბატონ ლიანას მართლაც მე შევახსენე (თვითონ არც ახსოვდა!), რომ 1991 წელს ლიუბეკის მუსიკის აკადემიაში მიმიღეს, მაგრამ მისი სტიპენდიის გარეშე ვერც სტუდენტურ ვიზას ვეღირსებოდი და ვერც პირველი ხანების სირთულეებს გადავლახავდი.
უსაზღვროდ და სამუდამოდ მადლობელი ვარ მისი ამ დახმარებისთვის“!

ლიანა ისაკაძემ საქართველოს ხელისუფლებას ვრცელი წერილით გუშინ მიმართა. წერილში ჩანს ისაკაძისა და კულტურისა და ძეგლთა დაცვის მინისტრის მოადგილის, ბადრი ბაგრატიონ-გრუზინსკის შორის არსებული დაპირისპირება. ლიანა ისაკაძე წერილში სინანულს გამოთქვამს, რომ საქართველოს მოქმედმა ხელისუფლებამ მისი საქველმოქმედო მოღვაწეობის შესახებ არაფერი იცის.

„მე არ ვარ ის ადამიანი, ვინც მის მიერ გაკეთებულ სიკეთეზე ყვირის! მაგრამ როცა ასე უსამართლოდ ლაპარაკობენ ჩემზე, მაშინ მე ძალიან მწყინს და მაქვს უფლება, მოვყვე სიმართლე“! - წერს მსოფლიოში აღიარებული ქართველი მევიოლინე.