შიდა ქართლის პროკურატურამ კასპის რაიონის სოფელ თელიანში 1960 წელს დაბადებული ზურაბ დემეტრაშვილი დააკავა. გორის სასამართლომ მას 1 ივლისს აღკვეთის ღონისძიების სახით გირაო, 4 ათასი ლარი შეუფარდა.

ზურაბ დემეტრაშვილს ბრალი თანასოფლელის ანა ბერიაშვილის საცხოვრებელი სახლის ინტერიერის დაწვაში ედება. გამოძიება სისხლის სამართლის კოდექსის 187-ე მუხლის მეორე ნაწილით (სხვისი კუთვნილი ნივთის დაზიანებით) მიმდინარეობს. ანა ბერიაშვილმა 715 ლარის ზიანი მიიღო.

სასამართლო პროცესზე ფაქტის არსებითი გამოძიება ჯერ არ დაწყებულა. პროკურატურა თვლის, რომ ზურაბ დემეტრაშვილი გამოძიებას არ მიემალება და წინასწარი გამოძიების პირობებში სამართალდამცავებთან ითანამშრომლებს. სწორედ, ეს გახდა გირაოს მოთხოვნის ერთ-ერთი არგუმენტი.

დემეტრაშვილებსა და ბერიაშვილების ოჯახებს შორის დავა დიდი ხანია მიმდინარეობს. სოფლის ტერიტორიული ორგანოს რწმუნებულის განცხადებით, დემეტრაშვილებსა და ბერიაშვილებს შორის დავა მას შემდეგ დაიწყო, როდესაც ზურაბ დემეტრაშვილმა ანა ბერიაშვილის მეუღლე, თბილისში, სამუშაოდ წაიყვანა.

"როგორც ჩემთვის ცნობილია, ზურაბ დემეტრაშვილმა მშენებლობაზე სამუშაოდ ანა ბერიაშვილის მეუღლე წაიყვანა თბილისში. მას შემდეგ ქმარი ოჯახს აღარ დაბრუნებია და ეს ქალბატონი ყველაფერს ზურაბ დემეტრაშვილს აბრალებს, რომ მისი წყალობით მოხდა ეს ყველაფერი. ჰქონდათ უთანხმოება, შეურაცხყოფები და დაძაბულობები. სოფელში ასე ვიცით, რომ სახლის დაწვის მცდელობა ერთ-ერთი ასეთი ჩხუბის დროს მოხდა”,-აცხადებს ტერიტორიული ორგანოს რწმუნებული.

სასამართლო პროცესი თვენახევარში დაიწყება და ინციდენტის უფრო ზუსტი მიზეზები პროცესზე გახდება ცნობილი.

წყარო: qartli.ge