"სიმინდის კუნძულის" მსოფლიო პრემიერა

საზოგადოება - 16:16, 27 Jun, 2014

1118

9 ივლისს, გიორგი ოვაშვილის "სიმინდის კუნძულის" მსოფლიო პრემიერა კარლოვი ვარის კინოფესტივალზე შედგება. ფილმი ფესტივალის მთავარ კონკურსში იქნება წარმოდგენილი, ქართველ მაყურებელს კი მისი ნახვის საშუალება საქართველოს კინოთეატრებში სექტემბრიდან მიეცემა. გიორგი ოვაშვილის ახალი ფსიქოლოგიური დრამის სცენარი სამი წლის განმავლობაში იქმნებოდა. მოქმედება 2008 წელს ვითარდება, მთავარი გმირები კი აფხაზი ბაბუა და შვილიშვილი არიან, ფილმი მათ მძიმე მაგრამ საინტერესო ცხოვრებაზე მოგვითხრობს. ”სიმინდის კუნძულის“ გადაღებისთვის სპეციალურად ხელოვნური კუნძული შეიქმნა, რომლის ლოკაციას დიდი ხნის განმავლობაში ეძებდნენ და საბოლოოდ მდინარე ენგური შეირჩა, სადაც პატარა კუნძული გაშენდა. რეჟისორს ფილმის გადაღების იდეა მას შემდეგ გაუჩნდა, რაც საინტერესო რეალური ისტორია მოისმინა ნუგზარ შაყაიძისგან, აფხაზი ბაბუისა და შვილიშვილის შესახებ. რაც შეეხება მთავარ გმირებს, გიორგი ოვაშვილი თავისი ნამუშევრებისთვის ყოველთვის არაპროფესიონალ მსახიობებს არჩევს, რადგან თვლის, რომ ისინი ნაკლებად თამაშობენ და ბევრად უფრო საინტერესო პერსონაჟებს ქმნიან. ფილმზე ”სიმინდის კუნძული“ ასევე მსოფლიოში ცნობილი უნგრელი ოპერატორი ელემერ რაგალი მუშაობს, რომელიც 2001 წელს პრემია ”ემის” მფლობელი გახდა. მის ანგარიშზე ათობით სატელევიზიო და მხატვრული ნამუშევრია. ოპერატორი ბოლოს რეჟსორ იშტვან საბოსთან ერთადაც მუშაობდა. ფილმის ბიუჯეტი 1.5 მილიონი ევროა. სპეციალურად ფსიქოლოგიური დრამისათვის კომპოზიციები იოსებ ბარდანაშვილმა შექმნა. ფილმის ქრონომეტრაჟი 100 წუთს შეადგენს.
წყარო: http://fortuna.ge/