რა მოგებას ნახულობს საქართველოს ირანთან სავაჭრო-ეკონომიკური ურთიერთობებით

ბიზნესი & ეკონომიკა - 14:52, 26 Jun, 2014

2480

მიმდინარე წლის 31 იანვარს თბილისში დაფუძნდა აიპ „საქართველო-ირანის გაერთიანებული სავაჭრო-სამრეწველო პალატა“, რომლის მთავარი მიზანია უზრუნველყოს ქვეყნებს შორის გრძელვადიანი და ორმხრივად საინტერესო ეკონომიკური თანამშრომლობა.

პალატა დღეისთვის თავის რიგებში აერთიანებს 100-ზე მეტ ქართულ და ირანულ კომპანიას, რომლებიც სხვადასხვა სფეროში მოღვაწეობენ და აქტიურ როლს ასრულებენ ორ ქვეყანას შორის ეკონომიკური ურთიერთობის განვითარებაში. ფუნქციონირებს 6 დარგობრივი კომიტეტი - ვაჭრობის, სატრანსპორტო, ტურიზმის, ნავთობპროდუქტების, საინჟინრო-ტექნიკური და სოფლის მეურნეობის კომიტეტები, ასევე, მოწვეული ექსპერტები და სპეციალისტები.

გასულ წელს სავაჭრო ბრუნვამ ირან-საქართველოს შორის 180 მილიონი დოლარი შეადგინა. ყოველწლიურად საქართველოში 10 000-მდე ირანელი ვიზიტორი შემოდის და 100 მილიონამდე დოლარი რჩება სახელმწიფოში. ყველაზე მეტად განვითარებულია შემდეგი სფეროები: ინფრასტრუქტურის მშენებლობა (საგზაო ბიტუმის პროდუქტი - ასფალტის წარმოების ერთ-ერთი მთავარი კომპონენტი; აღსანიშნავია, რომ საგზაო ბიტუმის 98% შემოდის ირანიდან), ტურიზმი, ვაჭრობა, მშენებლობა, სოფლის მეურნეობა.

,,ჩვენი ამოცანაა ორი ქვეყნის ბიზნეს წრეებს მივცეთ საშუალება დაამყარონ მჭიდრო პარტნიორული ურთიერთობა, რაც ვფიქრობთ, იქნება წინაპირობა, ეფექტურად გამოვიყენოთ ირანის ისლამური რესპუბლიკის შესაძლებლობები.

საინტერესო საინვესტიციო და ინოვაციური პროექტები, საქართველოს ბაზარზე ახალი პროდუქციის შექმნა, ასევე, ექსპორტის განხორციელება ირანის ისლამურ რესპუბლიკაში - ეს გახლავთ მთავარი პრიორიტეტები ჩვენს საქმიანობაში”, - განაცხადეს საქართველო-ირანის გაერთიანებულ სავაჭრო-სამრეწველო პალატაში.

საქართველო-ირანის გაერთიანებული სავაჭრო-სამრეწველო პალატა ყველა ფიზიკურ თუ იურიდიულ პირს მოუწოდებს, სურვილის შემთხვევაში დაუკავშირდნენ შემდეგ მისამართზე:

მის: თბილისი, ი. ჭავჭავაძის გამზ. #78, ბ. #6.

ტელ: (+995 32) 2 183 000

ელ-ფოსტა: georgianiran.chamber@yahoo.com