ქართული ხილი რუსულ ბაზარზე გადის. ატმის პირველი პარტია კახეთიდან რუსეთში უკვე გაიგზავნა. ხილის ექსპორტიორმა კომპანია „ფრუიტილიამ“ საექსპორტოდ სოფელ ჩუმლაყში 60 ტონამდე ატამი და ვაშლატამა ადგილობრივი ფერმერებისგან იყიდა.

„პროდუქცია ქართველებთან ერთად შეამოწმეს რუსმა ფიტოსანიტარებმა და ის აკმაყოფილებს საერთაშორისო სტანდარტებს, აქედან გამომდინარე, ჩვენ პრობლემა არ შეგვქმნია. პირველი მანქანა უკვე დაიტვირთა და მზად არის, ვაგრძელებთ მუშაობას და ვაპირებთ გავიტანოთ 1000 ტონამდე ხილი. ფასები როგორ დარეგულირდება, იმის მიხედვით გავაგრძელებთ გატანას“,-განმარტა კომპანიის დამფუძნებელმა.

რუსეთის ბაზარზე ხილის გატანის უფლება ქართველმა და რუსმა ფიტოსანიტარებმა შესაბამისი სერტიფიკატით დაადასტურეს.