„ასეთი ორიგინალური ხავერდის დიზაინით საქართველოში CD ალბომი ჯერ არ გამოცემულა... კაკადუს ნახატიც ძალიან ორიგინალურია, აღარაფერს ვამბობ სიმღერებზე, რომლებიც უმაღლესი ხარისხითაა აღდგენილი - ამბობს „ბრავო რექორდსის“ დამფუძნებელი ზაზა შენგელია.

ბრავო რექორდსმა ამ ორიგინალური დიზაინით ირაკლი ჩარკვიანის ახალი CD ალბომი ”The best of KING“ გამოსცა.

CD ალბომში შედის ირაკლი ჩარკვიანის 11 ყველა დროის საუკეთესო ჰიტი და ასევე მსმენელისათვის ნაკლებად ცნობილი 5 ბონუს სიმღერა.

CD ალბომის განსხვავებული დიზაინი ქეთათო პოიაშვილს და დავით მაჭავარიანს (კაკადუ) ეკუთვნით. ალბომის სრული ტირაჟი სპეციალური შეკვეთით უკრაინაში დაიბეჭდა. CD ალბომს თანდართული აქვს მინი კატალოგი, რომელიც აწყობილია ირაკლის საუკეთესო ლექსებით, ექსკლუზიური ფოტოებითა და ჩანაწერებით.

ზაზა შენგელია: „აღსანიშნავია ის ფაქტი, რომ მუსიკალურ მაღაზიებში ირაკლი ჩარკვიანის არც ერთი ალბომი არ არის გაყიდვაში და ამ ალბომის სახით, ”ბრავო რექორდსმა” შესძლო მისი შემოქმედების საუკეთესო ნამუშევრების თავმოყრა და ერთ ალბომად გაერთიანება, რომელიც ერთიან წარმოდგენას შეუქმნის თითოეულ ადამიანს თუ როგორი იყო ირაკლი ჩარკვიანი. ეს ალბომი უდიდესი საჩუქარია ირაკლის ერთგული მსმენელისათვის“.