გლდანის ივერიის ყოვლადმწმინდა ღვთისმშობლის ეკლესიის წინამძღვარი, მამა ბასილი მკალავიშვილი „ალიას“ ეკლესიაში მიმდინარე მოვლენებზე ესაუბრა. მკალავიშვილმა პატრიარქის მემკვიდრესთან დაკავშირებითაც გააკეთა კომენტარი:

„ყველასთვის ცნობილია, რომ ამას წინათ სანამ სინოდის სხდომა გაიმართებოდა, გამოქვეყნდა პატრიარქის განცხადება, რომ ავადმყოფობის გამო აპირებდა გადადგომას. აღვნიშნავ, რომ ლოგიკური გადაწყვეტილება იყო, მაგრამ სინოდის სხდომაზე ყველაფერი შეიცვალა, რადგან თითქმის 4 ჯგუფს ჰყავს თავიანთი კანდიდატურა, ღვთის ნებას არას დაგიდევენ, ყველა პირველობისკენ ილტვის. მოგახსენებთ, რომ პატრიარქი თავად წერს ანდერძს.

არ აქვს მნიშვნელობა, შეიძლება არ ავადმყოფობდეს, მაგრამ სხვა მიზეზებით გარდაიცვალოს, ამ შემთხვევისთვის მას უწერია ვინ უნდა იყოს პატრიარქი, ეს გასაიდუმლოებული რამ არის. მხოლოდ მან იცის, სხვა არავინ. ჩემთვის გაუგებარია, როგორ გაიგეს ვინ ეწერა ანდერძში.

ეს მხოლოდ თვით პატრიარქმა იცის, ანდერძი სეიფში დევს და გასაღებიც მას აქვს, პატრიარქის გარდაცვალების შემთხვევაში იხსნება სეიფი და ხდება საჯარო. აი, ერთერთი მაგალითი იმისა, რომ განუკითხაობა სუფევს. იცით რას გეტყვით? როცა საპატრიარქოში ათი-თორმეტი ეპისკოპოსი მოღვაწეობდა, უფრო მეტი წესრიგი სუფევდა და არა ისე, როგორც დღეს, 50-მდე ეპისკოპოსია, მათ სიმრავლეს არანაირი ფასი არ აქვს“, - აცხადებს ბასილი მკალავიშვილი.