ახალი პროგრამა ორი ქვეყნის მოსაზღვრე რეგიონებში

ბიზნესი & ეკონომიკა - 18:55, 24 Jun, 2014

2616

საქართველოს დელეგაცია ოფიციალური ვიზიტით სომხეთში იმყოფებოდა. დელეგაციის შემადგენლობაში იმყოფებოდნენ საქართველოს რეგიონული განვითარებისა და ინფრასტრუქტურის მინისტრის პირველი მოადგილე, თენგიზ შერგელაშვილი, თვითმმართველობის განვითარებისა და რეგიონული პოლიტიკის დეპარტამენტის უფროსი, გიორგი წაქაძე და სხვა სახელმწიფო სტრუქტურების წარმომადგენლები.

ქართული დელეგაცია ქალაქ დილიჟანში გამართულ ევროკავშირის აღმოსავლეთ პარტნიორობის ტრანსსასაზღვრო თანამშრომლობის პროგრამის ერთობლივი მართვის კომიტეტის პირველ სხდომას დაესწრო, რომლის მიზანსაც, აღნიშნული პროგრამის ფარგლებში, სამოქმედო გეგმის შემუშავება წარმოადგენდა.

სომხურ-ქართული ტერიტორიული თანამშრომლობის პროგრამა, აღმოსავლეთ პარტნიორობის ტერიტორიული თანამშრომლობის ხელშეწყობის პროგრამის რჩევით, სომხეთის რესპუბლიკის ტერიტორიული ადმინისტრირების სამინისტროსა და საქართველოს რეგიონული განვითარებისა და ინფრასტრუქტურის სამინისტროს ხელმძღვანელობით ერთობლივად მომზადდა. უკვე ჩამოყალიბდა სამუშაო ჯგუფიც, რომელიც ერთობლივი სამოქმედო პროგრამის შემუშავებას ორივე მონაწილე მხარის თემების მიერ ტერიტორიული თანამშრომლობის პროგრამის ფლობის გაფართოებას უზრუნველყოფს.

ევროკავშირის მიერ დაფინანსებული სოციალური და ეკონომიკური განვითარების პროექტის ბენეფიციარები ორი ქვეყნის მოსაზღვრე რეგიონები იქნებიან. პროგრამაში, სომხეთის მხრიდან, ჩაერთვება ლორის, შირაკისა და ტავუშის რეგიონები, ხოლო საქართველოში ეს პროგრამა 2 რეგიონს მოიცავს - ქვემო ქართლსა და სამცხე-ჯავახეთს.

მხარეები შეთანხმდნენ გაერთიანებული სამოქმედო პროგრამის ფარგლებში სამიზნე რეგიონებში განსახორციელებელი სამუშაოების ძირითად მიზნებსა და პრიორიტეტებზე. ასევე, იმ სისტემებსა და პროცედურებზე, რომლებიც დასახული ამოცანების წარმატებით შესრულებას უზრუნველყოფენ.

აღმოსავლეთ პარტნიორობის ტრანსსასაზღვრო თანამშრომლობის საქართველო-სომხეთს შორის განსახორციელებელ პროგრამას ევროკავშირი აფინანსებს და მისი საერთო ბიუჯეტი 1,35 მილიონ ევროს შეადგენს.