საქართველოში მყოფი რუსი ექსპერტები სოფლის მეურნეობის პროდუქტების შემოწმებას დღეიდან იწყებენ. თავდაპირველად ისინი კახეთს ეწვევიან, საიდანაც დიდი ოდენობით ატმის მოსავლის გატანა იგეგმება.

რუსი სპეციალისტები ქართველ კოლეგებთან ერთად საექსპორტო პროდუქციის - ხილისა და ბოსტნეულის ფიტოსანიტარულ კონტროლს ჩაატარებენ.

სურსათის ეროვნული სააგენტოს ფიტოსანიტარული დეპარტამენტის უფროსის, ზურაბ ლიპარტიას თქმით, პროდუქციის ფიტოსანიტარული კონტროლი მნიშვნელოვანია, რათა ექსპორტის დროს პრობლემები არ შეიქმნას.

“მათი ჩამოსვლის ძირითად მიზანს წარმოადგენს ჩვენთან მოყვანილი სასოფლო-სამეურნეო პროდუქციის მონიტორინგი. მივემგზავრებით კახეთში, სადაც დაგეგმილია ატმის ბაღების მონიტორინგი. სპეციალური მეთოდით შემოწმდება ყველა პარტია და ეს ხელს შეუწყობს იმას, რომ პროდუქცია ფიტოსანიტარული კუთხით იყოს საიმედო, რომ ადვილად მოხვდეს რუსეთის ბაზარზე”,- განაცხადა ზურაბ ლიპარტიამ.