კიევში, ბორისპოლის აეროპორტში თბილისი-კიევის რეისის 26 ქართველი მგზავრი დააკავეს. ინფორმაციას ფოტოგრაფი ზურაბ ჯავახაძე ავრცელებს, რომელიც ამავე რეისის მგზავრი იყო.

„ჩემს თვალწინ უკრაინელმა მესაზღვრეებმა ბორისპოლის აეროპორტში რეკორდი დაამყარეს. მათ თბილისი-კიევის რეისის 26 ქართველი მგზავრი საბუთების დამატებითი შემოწმების პროცედურის გასავლელად და დასაკითხად დააკავეს. მესაზღვრეების კაბინეტთან ლოდინის დროს შევამჩნიე, თუ როგორ თავაზიანად ეპატიჟებოდნენ რუსეთის მოქალაქეებს გასაუბრებაზე, ჩვენ კი 2 საათი გვალოდინეს. ამ დროს ეჭვი გამიჩნდა, რომ ყირიმი საქართველომ მიიერთა. მაგრამ როდესაც ჩვენს 26–კაციან „დელეგაციას“ ყაზახეთიდან ჩამოფრენილი კიდევ 4 ქართველი შეუერთდა, მე უკვე დავრწმუნდი, რომ საქართველომ ნამდვილად „დაიბრუნა“ ყირიმი და ახლა დონეცკისა და ლუგანსკის ოლქების მიერთებასაც აპირებს. მომხრე ვარ უკრაინაში წარმატებული რეფორმების ჩატარების და ამ პროცესში ქართველი პოლიტიკოსებისა და რეფორმატორების ჩართულობის, თუმცა კარგი იქნებოდა, რომ ამ პოლიტიკოსებმა გააკეთონ ისე, რომ საქართველოს მოქალაქეებს მოექცნენ, როგორც ნორმალურ ადამიანებს და არა როგორც ნიგერიიდან აშშ-ში ჩასულ მეორეხარისხოვან მონებს!“ – წერს ჯავახაძე.

ამ დროისთვის დაკავებული ქართველები გათავისუფლებულები არიან და კიევში იმყოფებიან.