„ტელეარხი 25“-ის დირექცია და თანამშრომლები მუშაობას ერთი დღით წყვეტენ. ამის შესახებ ტელეკომპანიის მიერ გავრცელებულ განცხადებაშია ნათქვამი.

„უკანასკნელ პერიოდში „ტელეარხი 25“-ის დისკრედიტაციის მცდელობისა და ჟურნალისტების შეურაცხმყოფელი ფაქტების გამო არხის დირექციამ და თანამშრომლებმა ერთობლივად მივიღეთ გადაწყვეტილება პროტესტის რადიკალური ფორმისთვის მიგვემართა და ერთი დღით ვწყვეტთ მუშაობას. ვფიქრობთ, რომ ფაქტებზე რეაგირებისთვის, რომელიც საზოგადოებისთვის კარგადაა ცნობილი, საკმარისი დრო გავიდა, თუმცა ხელისუფლებისა და სამართალდამცავთა უმოქმედობის გამო შეურაცხმყოფელების მხრიდან თავდასხმებმა პერმანენტული ხასიათი შეიძინა. იმედს ვიტოვებთ, რომ ჩვენთვისაც უკიდურესად მძიმე გადაწყვეტილების შემდეგ პროკურატურა და პოლიცია უმოკლეს დროში შეძლებს ჟურნალისტებზე განხორციელებული სხვადასხვა სახის ზეწოლის ფაქტების გამოძიებას, ხელისუფლება კი იმ პირთა პოლიტიკური პასუხისმგებლობის დაყენებას, ვინც ამ ფაქტების უკან დგას“, - ნათქვამია განცხადებაში.