17 წლის გურამ დადიანიძეს ოჯახის წევრები მეორე დღეა სოფელ მლეთაში უშედეგოდ ეძებენ. ახალგაზრდა თანატოლ მეგობრებთან ერთად, ექსკურსიაზე იმყოფებოდა და მისი კვალი ლომისის ტაძრიდან ჩამოსვლის შემდეგ იკარგება.

ოჯახმა დახმარებისთვის პოლიციას და სამაშველო სამსახურსაც მიმართა, თუმცა მათი ინფორმაციით, დუშეთის და მცხეთის მაშველებმა ადგილზე მხოლოდ რამოდენიმე საათი იმუშავეს და ძებნა შეწყვიტეს.

ოჯახის წევრები და მეგობრები ამბობენ, რომ მაშველებმა ძებნა ცუდი ხილვადობის გამო შეწყვიტეს.

მათივე თქმით, გურამ დადიანიძე ნასვამი არ იყო, რადგან ის დამამშვიდებელ მედიკამენტს იღებდა. დაკარგვის ფაქტთან დაკავშირებით ძიება მიმდინარეობს და ხვალ ჟინვალის პოლიციაში ექსკურსიაზე დადიანიძესთან ერთად მყოფ მის მეგობრებს დაკითხვაზე ელოდებიან.