გველების შემოსევის ფაქტები თბილისში - "მთელი სამეზობლო შოკში იყო"

საზოგადოება - 13:47, 12 Jun, 2014

16292

"ტელეფონზე იყო დახვეული და თავი აწეული ჰქონდა, თავიდან კაბელი მეგონა, მაგრამ შემდეგ პირი რომ გახსნა, მივხვდი, რომ გველი იყო", - ვარკეთილის მეტროსთან მცხოვრებმა ლია ბერიკაშვილმა საკუთარ ბინაში გველი დილის 7 საათზე ნახა. ნახევარ მეტზე დიდი ქვეწარმავალი კორპუსის მე-4 სართულზე, ერთ ოთახიან ბინაში ოჯახის წევრებთან ერთად რამდენიმე დღე ცხოვრობდა.

"დილით, დაახლოებით 6 საათი ხდებოდა, როცა ჩემი მეუღლე სამსახურში გავაცილე და სახლში შემოვედი. ცოტა ხნის შემდეგ დავინახე რომ "მაგთი ფიქსის" ტელეფონზე რაღაც ფრიალებდა. თავიდან ყურადღება არ მივაქციე, ქალაქის ტელეფონის კაბელი მეგონა, მაგრამ შემდეგ რომ მივუახლოვდი და პირი გახსნა, მივხვდი, რომ გველი იყო. დახვეული იყო და თავი აწეული ჰქონდა. მაშინვე ბავშვი გავიყვანე მეზობელთან და "112"-ში დავრეკე. "112"-ის თანამშრომლების მოსვლის შემდეგ ქვეწარმავალი კარადის უკან გადაძვრა და იქ ცდილობდა დამალვას, მაგრამ მადლობა ღმერთს მისი დაჭერა მალევე მოახერხეს", - იხსენებს ლია ბერიკაშვილი.

მისი თქმით, გველი ბინაში სავარაუდოდ წინა დღის, ან რამდენიმე დღის შესული იყო, რადგან იმ ღამით ყველაფერი დაკეტილი იყო და ქვეწარმავალი ოთახში შესვლას ვერ მოახერხებდა.

"მთელი ღამე კი არა შეიძლება ორი დღით ადრეც შემოვიდა, უკვე მაგაზე ფიქრიც არ მინდა. ფაქტია, რომ იმ დღის შემოსული არ იყო, რადგან ყველაფერი ჩაკეტილი მქონდა. ან წინა დღეს შემოვიდა, ან რამდენიმე დღით ადრე და სახლში დამალული იყო. ერთ ოთახიანი ბინა გვაქვს და იმ ოთახში გვეძინა თურმე გველთან ერთად ყველას - მე, ჩემს მეუღლეს და ბავშვს", - აცხადებს Ambebi.ge-სთან საუბარში ლია ბერიკაშვილი.

როგორც ბერიკაშვილი იხსენებს, კორპუსსში მსგავსი ფაქტი არ დაფიქსირებულა და მთელი სამეზობლო შოკში იყო.

"ახლოს ყოფილი სამხედრო ნაწილის შენობაა, ძალიან დიდი ტერიტორიაა, შემოღობილი კი არის, მაგრამ მიტოვებულია და ამბობენ, რომ იქ ძალიან ბევრი გველიაო, შეიძლება იქიდან მოდიან, მაგრამ

სახლში და მეოთხე სართულზე ქვეწარმავალი არავის უნახავს", - ამბობს ბერიკაშვილი.

თბილისში ქვეწარმავლების მომრავლებას "112"-შიც ადასტურებენ. 1 ივნისიდან დღემდე, ანუ ბოლო ორ კვირაში თბილისის სხვადასხვა უბნიდან საგანგებო სიტუაციების მართვის სამსახურში ქვეწარმავლებთან დაკავშირებით 54 შეტყობინება შევიდა.

ზაფხულის მოახლოებასთან და სიცხის მატებასთან ერთად ქვეწარმავლები თბილისის სხვადასხვა უბანში მომრავლდნენ. მოსახლეობა გველების სიმრავლეს განსაკუთრებით ისანი-სამგორის რაიონში უჩივის და დახმარებას ითხოვს.

"იყო ყავისფერი, პრიალა და გრძელი, ასე 50 სანტიმეტრი იქნებოდა. ჩვენს მეზობელს დღეს დილითაც უნახავს, შეშინებულია ქალი. ჩვენ თვითონ, გოგირდსა და რეზინს ვწვავდით, რომ წასულიყვნენ, მაგრამ არაფერმა უშველა. ვითხოვთ, რაღაც მოგვაშველონ, რამე წამალი მაინც. სულ ბავშვები არიან და ვინმეს რომ უკბინოს, მერე რაღა ვქნათ", - აცხადებენ ფონიჭალას მაცხოვრებლები.

როგორც საგანგებო სიტუაციების მართვის სამსახურში აღნიშნავენ, გასული წლის ამავე პერიოდთან შედარებით სტატისტიკა არ გაზრდილა და მოსახლეობაში პანიკის საფუძველი არ არსებობს.

ამასთან, "112"-ის წარმომადგენლები მოსახლეობას ურჩევენ, ქვეწარმავლის ნახვის შემთხვევაში, არ მიუახლოვდნენ, არ სცადონ მისი ხელით დაჭერა, გამოიძახონ საგანგებო სიტუაციების მართვის სამსახური და მის მისვლამდე ყოველგვარ აქტივობას მოერიდონ.

წყარო: ამბები.ჯი