დარიალის ხეობაში სტიქიით გამოწვეული სალიკვიდაციო სამუშაოები გრძელდება.

დღეს, დილის 7 საათიდან, შ.პ.ს. სახელმწიფო სამშენებლო კომპანიამ, დევდორაკის ხეობაში სტიქიური მოვლენების სალიკვიდაციო სამუშაოები განაახლა.

დევდორაკის ხეობაში მობილიზებულია მძიმე ტექნიკა და ჩვეულ რეჟიმში მიმდინარეობს გაწმენდითი და საძიებო სამუშაოები.

ადგილზე იმყოფებიან რეგიონალური განვითარებისა და ინფრასტრუქტურის მინისტრის მოადგილე გიორგი ამაშუკელი, გზების დეპარტამენტის თავმჯდომარე დავით შავლიაშვილი და დეპარტამენტის უფროსის მოადგილე ვაჟა ფანჩულიძე.

გუშინ, მთელი დღის განმავლობაში, შესაბამისი სპეციალისტების მიერ, მიმდინარეობდა მყინვარწვერის, დევდორაკისა და ამალის ხეობების და ასევე მიმდებარე უბნების დაკვირვება. ამასთანავე, ხორციელდებოდა მყინვარწვერის მასივის სეისმოლოგიური დაკვირვება და ინფორმაციის ანალიზი.

მონაცემების განზოგადებისა და ვიზუალური და ფოტო დაკვირვებების შედეგების შეჯერების შედეგად, შესაბამისი სპეციალისტების მიერ, მიღებულ იქნა გადაწყვეტილება, დარიალის ხეობაში სამუშაოების განახლების თაობაზე.

როგორც ცნობილია, 17 მაისიდან დევდორაკის ხეობაში მიმდინარეობს სტიქიური მოვლების სალიკვიდაციო და საძიებო სამუშაოები, სადაც მობილიზებულია 70 მძიმე ტექნიკა და სხვადასხვა უწყების 200-მდე თანამშრომელი.

ამ დროითვის, უწყვეტ რეჟიმში, სპეციალურად შექმნილი სამეცნიერო ჯგუფის მიერ, გრძელდება მყინვარწვერის მასივის სეისმოლოგიური დაკვირვება. შესაბამისი დარგის სპეციალისტებისა და სასაზღვრო პოლიციის ძალებით მიმდინარეობს დევდორაკის ხეობის და ამალი-დევდორაკის შესართავის მუდმივი მონიტორინგი.

ხეობაში მომუშავე პერსონალის უსაფრთხოების უზრუნველყოფის მიზნით, სხვადასხვა უწყებების წარმოადგენლები, 24 საათიან რეჟიმში, ახორციელებენ კომპლექსურ ღონისძიებებს რათა თავიდან იქნას აცილებული ყოველგვარი გართულება და გათვალისწინებული იქნას ნებისმიერი მინიმალური რისკი.