,, საქართველოს ახალგაზრდა კონსტიტუციონალისტთა ასოციაცია“ წინასაარჩევნო გარემოს აფასებს

საზოგადოება - 13:33, 07 Jun, 2014

717

,,საქართველოს ახალგაზრდა კონსტიტუციონალისტთა ასოციაცია” 2014 წლის ადგილობრივი თვითმმართველობის წინსაარჩევნო გარემოს დადებითად აფასებს.

როგორც ,,ნიუპოსტს“ ახალგაზრდა კონსტიტუციონალისტთა ასოციაციიდან აცნობეს, ასოციაციას მიაჩნია, რომ გასულ წლებთან შედარებით საარჩევნო პროცესები გაცილებით უფრო ჯანსღ და მშვიდ გარემოში მიმდინარეობს, რაც თავის მხრივ ქვეყანაში დემოკრატიული არჩევნების ჩატარებას უზრუნველყოფს. მიუხედავად აღნიშნულისა, არის შემთხვევები, სადაც ცალსახად ირღვევა საარჩევნო კანონმდებლობა, რისი ნათელი მაგალითიცაა, 5 ივნისს, მარნეულის საოლქო საარჩევნო კომისიაში მომხდარი ინციდენტი. ასოციაცია მიიჩნევს, რომ მსგავსი ფაქტები არის საარჩევნო ადმინისტრაციაზე ზეწოლა და ხელს უშლის ქვეყანაში ჯანსაღი საარჩევნო გარემოს შენარჩუნებას.

,,გვინდა აღვნიშოთ, რომ საარჩევნო ადმინისტრაციის დამოუკიდებლობა და ხელშეუხებლობა, ერთ-ერთი აუცილებელი წინაპირობაა წარმატებული და დემოკრატიული არჩევნების ჩატარებისთვის. ასოციაცია იმედს გამოთქვამს, რომ 5 ივნისს მომხდარი ფაქტი ყოველი მხარის მიერ აღიარებული იქნება, როგორც საარჩევნო ადმინისტრაციაზე ზეწოლა.

აღსანიშნავია, რომ ,,ერთიანი ნაციონალური მოძრაობის” მხრიდან, მთელ რიგ შემთხვევებში ფიქსირდება აქტიური გამოხმაურება მმართველ პოლიტიკურ ძალასთან დაკავშირებით არაარსებით ფაქტობრივ გარემოებებზე, რომელთა იდენტიფიცირებაც შემდგომში მათი მხრიდან დარღვევებად ხდება. მეორეს მხრივ კი დამოუკიდებელი კანდიდატების მიერ ჩადენილ აშკარა კანონდარღვევებზე რეაგირება თითქმის არ ხდება. ეს ყოველივე იძლევა ეჭვის საფუძველს, რომ გარკვეული ჯგუფების მიერ, მიზანმიმართულად მიმდინარეობს საარჩევნო გარემოს სტაბილურობისა და სიჯანსაღისათვის ხელის შეშლა“, - ნათქვამია ასოციაციის განცხადებაში.

არასამთავრობო ოგანიზაცია ,,საქართველოს ახალგაზრდა კონსტიტუციონალისტთა ასოციაცია” მოუწოდებს საარჩევნო პროცესებში მონაწილე ყველა სუბიექტს და განსაკუთრებით პოლიტიკურ პარტიებს, იმოქმედონ მხოლოდ საარჩევნო კანონმდებლობით განსაზღვრულ ფარგლებში და მაქსიმალურად შეუწყონ ხელი არჩევნვების მშვიდ გარემოში ჩატარებას.