ნიკოლოზ რაჭველი ფეისბუქის გვერდზე განცხადებას აქვეყნებს და მოსახლეობას მოუწოდებს პოლიტიკის სანაცვლოდ კლასიკური მუსიკით დაინტერესდნენ და ვირტუოზი მუსიკოსების მიერ შესრულებული მუსიკით დატკბნენ.

ნიკოლოზ რაჭველი:

„ხვალ რუსთაველის თეატრში 8 საათზე ჩვენი ფესტივალის მორიგი კონცერტია სადაც დაუკრავს თანამედროვეობის ერთერთი უბრწყინვალესი ახალგაზრდა ჩელისტი ნიკოლას ალტშტატი! ძალიან მინდა რომ მოხვიდეთ და მოისმინოთ! საერთოდ ძალიან მინდა რომ გაცილებით დიდ ინტერესს იწვევდეს კლასიკური მუსიკა ჩვენს საზოგადოებაში, რაც სამწუხაროდ ასე არ არის! რატომღაც ყველას ურჩევნია საღამო ტელევიზორთან გაატაროს და პოლიტიკურ-საიმფორმაციო სიახლეებს შეაკლას ნერვული სისტემა!
ხოლო თუ კი ვინმეს მიაჩნია, რომ ბილეთებია ძვირი ეს ასე არ არის, 10-20 ლარი მგონი შესაძლებლობების ფარგლებს მიესადაგება, თუმცა სტუდენტების პასიურობა მაკვირვებს ყველაზე მეტად, მით უფრო რომ მათთვის დასწრება 5 ლარს არ აღემატება, თუმცა თანხის არ ქონის შემთხვევაში მათ ისედაც ვუშვებთ ხოლმე დარბაზში... ერთი სიტყვით, მე მინდა ყველა ჩემს ფეისბუქის მეგობრებს და გამომწერებს მოგმართოთ თხოვნით, რომ მოისმინოთ ის მუსიკა და დაესწროთ იმ კონცერტებსა და ფესტივალებს, რომლის ორგანიზებისთვის, შემოქმედებითად მომზადებისთვის მე და ჩემს ორკესტრის მუსიკოსებს ღამეები გვაქვს ნათენები და სასიცოცხლო ენერგია გვაქვს გაღებული... წინააღმდეგ შემთხვევაში აზრი დაეკარგება ჩემსა და ჩვენს მოღვაწეობას ჩვენს ქვეყანაში და საერთო მუსიკალური გემოვნება სამუდამოდ განადგურდება ჩვენს ირგვლივ...
ყოველ შაბათს ჩვენ ვუკრავთ თქვენთვის და თქვენგანაც გვჭირდება ვიგრძნოთ, რომ ჩვენ თქვენ გჭირდებით, ხოლო მაღალი მუსიკა ჩვენს სულებსა და ინტელექტს რომ სჭირდება ამაზე არც არავინ დაობს...
იმედი მაქვს შემომიერთდებით იმ საქმეში, რომელიც თქვენს გარეშე მართლაც კარგავს თავის მნიშვნელობას! თქვენი ნიკა“