9 წლის ვეფხია წიკლაური გარდაიცვალა

შემთხვევა - 09:44, 06 Jun, 2014

5257

დიმიტრი ცინცაძის სახელობის ფონდს, კიდევ ერთი შვილობილი, 9 წლის ვეფხია წიკლაური გარდაეცვალა.

„შეგნებულად არ გავავრცელე ეს ამბავი ამ დრომდე. დიდი ტკივილით მინდა გაუწყოთ, რომ დიმიტრი ცინცაძის სახელობის ფონდს, კიდევ ერთი შვილობილი, 9 წლის ვეფხია წიკლაური გარდაგვეცვალა. ფონდმა მართლაც ყველაფერი გააკეთა მის გადასარჩენად , მაგრამ ვეფხია უფალმა წაიყვანა თავისთან.

1 კვირის წინ, ფონდი დაეხმარა ვეფხიას მისთვის აუცილებელი, ძვირადღირებული მედიკამენტებით, მაგრამ ჩვენდა საუბედუროდ, ამ ვერაგმა დაავადებამ ლეიკემიამ, როგორც განწირული ბავშვების შემთხვევაში ხდება ხოლმე, გამოიწვია გაჟონვა და ბავშვი კომიდან ვეღარ გამოვიდა.

ვეფხიას გარდაცვალება მამამ, გიორგიმ ტელეფონით აცნობა რუსუდან ცხომელიძეს, რის შემდეგაც, ამ საშინელმა ამბავმა რუსიკოზე ძალიან მძიმედ იმოქმედა, მან ემოცია, ტირილი ვერ დაფარა ტელეფონში საუბრისას და რაოდენ დიდსულოვანი იყო გიორგის საქციელი ყოველივე ამის შემდეგ, როდესაც შვილმკვდარი მამა აწყნარებდა რუსიკოს.

მე ფონდის სახელით ჩავედი საგარეჯოს რაიონ, სოფელ ყანდაურაში, ვეფხია წიკლაურის ოჯახში. ამ ოჯახმა ერთადერთი შვილის დაკარგვასთან ერთად, დაკარგა აბსოლუტურად ყველაფერი თუკი რამ გააჩნდათ. ჩვენი ფონდი ისეთივე ჭირისუფალია დღეს, როგორიც არის ვეფხიას ოჯახი ! ამიტომ მე, ფონდის სახელით ,ვეფხიას სარიტუალო ხარჯების გასაწევად, ოჯახს გადავეცი 1000 ლარი.

ამ ყველაფრის მიუხედავად, ჩვენ არ ვყრით ფარ-ხმალს და ვიბრძოლებთ ჩვენი შვილობილების გადარჩენისათვის ! ღმერთმა ცათა სასუფეველი დაუმკვიდროს პატარა 9 წლის ვეფხია წიკლაურს სადაცა მართალნი განისვენებდეს !

დარეკეთ და იბრძოლეთ ჩვენთან ერთად ლეიკემიით და სოლიდური სიმსივნეებით დაავადებული ჩვენი შვილობილების გადასარჩენად ! 09 01 08 08 06“,- წერს „დიტო ცინცაძის დახმარების ფონდის" დირექტორი კახა ჯანაშვილი.