5 ივნისი გარემოს დაცვის საერთაშორისო დღეა

საზოგადოება - 16:19, 05 Jun, 2014

1273

დღეს გარემოს დაცვის საერთაშორისო დღეა. საქართველოს გარემოსა და ბუნებრივი რესურსების დაცვის სამინისტროსა და გაეროს განვითარების პროგრამის (UNDP) ინიციატივით, ივნისი „მწვანე თვედ" ცხადდება, რომლის ფარგლებშიც 5 ივნისს სხვადასხვა ღონისძიებები გაიმართება.
"კამპანიის სლოგანია "ჩემი გარემო". მისი მიზანია შეგვახსენოს, რომ ყოველ ჩვენთაგანს შეუძლია თავისი წვლილი შეიტანოს გარემოს დაცვის საქმეში, გაუფრთხილდეს ჩვენს პლანეტას და იზრუნოს მსოფლიოს მწვანე და უსაფრთხო მომავალზე",- აცხადებენ გარემოს დაცვის სამინისტროში.
ამ დღესთან დაკავშირებით, ბაზალეთში თემაზე - "საქართველოს სატყეო სექტორის მიმდინარე რეფორმა და სამომავლო თანამშრომლობის საკითხების განხილვა" პირველი საერთაშორისო კონფერენცია იმართება, რომელიც გარემოსა და ბუნებრივი რესურსების დაცვის მინისტრმა ხათუნა გოგალაძემ გახსნა.
მას 13 სხვადასხვა ქვეყნის მაღალი რანგის დელეგაცია ესწრება. კონფერენციაზე განიხილება სატყეო სექტორის ინსტიტუციური რეფორმის ძირითადი საკითხები საქართველოსა და ცენტრალური ევროპის ქვეყნებში. ევროპელი კოლეგები წარმოადგენენ ევროპულ გამოცდილებას და მოხდება ამ გამოცდილების გაზიარება მხარეებს შორის. ღონისძიება ეროვნული სატყეო პროგრამის ფარგლებში ტარდება. საქართველოს ეროვნული სატყეო პროგრამა არის დინამიური პროცესი, რომელიც ყველა დაინტერესებული მხარის ჩართულობით უზრუნველყოფს სატყეო სექტორის რეფორმის განხორციელებას.
13:30 საათზე მინისტრი საქართველოს ეროვნულ მუზეუმს ეწვევა და "NATIONAL GEOGRAPHIC-საქართველოს" მიერ მოწყობილ ფოტოგამოფენას -„ბუნება და ადამიანი" დაათვალიერებს.
16:00 საათზე გარემოსა და ბუნებრივი რესურსების დაცვის სამინისტროში ჩეხეთის საგარეო საქმეთა მინისტრის ლუბომირ ზაორალეკის ვიზიტია დაგეგმილი, რომელსაც გარემოსა და ბუნებრივი რესურსების მინისტრი ხათუნა გოგალაძე უმასპინძლებს. სტუმარი ნარჩენების მართვის თემატიკის ამსახველ ფოტოგამოფენას დაათვალირებს.
19:00 საათზე “ჰაინრიხ ბიოლის” ფონდში თემაზე: ევროპის ახალი პოლიტიკური ლანდშაფტი: მწვანე პოლიტიკის ისტორის გერმანიასა და საქართველოში" საჯარო დისკუსია გაიმართება, რომელშიც მონაწილეობას გარემოსა და ბუნებრივი რესურსების დაცვის მინისტრი ხათუნა გოგალაძე მიიღებს.
მინისტრი საქართველოს გარემოს დაცვის სფეროში შექმნილი არსებული სიტუაციისა და გამოწვევების შესახებ ისაუბრებს.
გარდა 5 ივნისის ღონისძიებებისა, „მწვანე თვის" ფარგლებში გარემოს დაცვის სამინისტრო მთელი ივნისის განმავლობაში არაერთ აქტივობას გეგმავს.
5 ივნისი გარემოს დაცვის საერთაშორისო დღედ 1972 წლის 15 დეკემბერს გაეროს გენერალურმა ასამბლეამ გამოაცხადა. გაეროს გარემოსდაცვითი დღის აღნიშვნა მიზნად ისახავს ადამიანთა პასუხისმგებლობის გაცნობიერებას გარემოს მიმართ, მისი მდგრადი განვითარებისათვის ხელშეწყობას, შენარჩუნებისა და გაუმჯობესებისათვის ბრძოლაში საზოგადოების აქტიურ ჩართვას.
გარემოსდაცვითი ინიციტივები ხორციელდება საქართველოს მთავრობის, ფინეთის მთავრობის, ევროკავშირის, გაეროს განვითარების პროგრამის (UNDP) და მსოფლიო გარემოსდაცვითი ფონდის (GEF) ფინანსური მხარდაჭერით.